Yangi tayinlangan Toshkent shahar hokimi Shavkat Umrzoqov “Daryo” muxbiriga bergan intervyusida poytaxtning drenaj tizimi o‘rganib chiqilgani, yog‘ingarchilik paytida ko‘chalarni nega suv bosganini izohladi.
Toshkent shahriga Xitoyda ishlab chiqarilgan 233 ta avtobus va elektrobuslar olib kelindi. Yangi transport vositalari taqdimotidan so‘ng, shahar hokimi Shavkat Umrzoqov elektrobusda sayr qilib, jurnalistlar bilan muloqotda bo‘ldi. Jumladan, hokim so‘nggi vaqtda poytaxtda kuzatilayotgan yog‘ingarchilik sababli ko‘chalarni suv bosayotgani to‘g‘risidagi savolga javob qaytardi.
“Drenaj tizimini o‘rgandim. Bunda insonlarda, aytaylik, o‘zimizda ham ayb bor. Shahardagi 20-30 foiz drenajlarni fuqarolar qurilish jarayonida buzib yuborgan. Bularning hammasini o‘rganishlar davomida aniqladik. Endi buzilgan drenajlarni qanday tiklashni, ertaga bunday qonunbuzilishga yo‘l qo‘ygan insonlarga qanday jazo choralari ko‘rilishini o‘ylayapmiz. Axir bu davlat mulki hisoblanadi. Insonlar suv toshdi, deydi. Ahamiyat beringlar, nega suv toshdi? Birinchidan, ko‘cha asfalt bo‘ldi va suv shimmadi. Odamlar uy quryapti. Qurmasa ham yozib yuboradi. Qurmoqchiman, ruxsat berishmayapti, deb. Qurilish uchun sharoitlar qilib berilgan. Lekin aholi qurilish madaniyatiga rioya qilib qurishi kerak. Yer ostidan o‘tgan drenaj tizimlarini yopib yubormaslik zarur”, — dedi hokim.
Ijtimoiy tarmoqlarda 2-aprel kuni Toshkentda kuzatilgan yog‘ingarchilik sabab ko‘plab ko‘cha va metro bekatlarini suv bosgani aks etgan videolar tarqalgandi.
Shundan so‘ng, poytaxt hokimligi yomg‘ir suvlari nima sababdan ko‘chalarga toshib ketganiga izoh bergan.
“Toshkent shahridagi lotoklarning o‘rtacha diametri 300 mmga teng. Ular yog‘ingarchilik suvlarini kollektorlar va kanallarga yetkazadi. 2-aprel kuni 2 soat davomida kuzatilgan kuchli yog‘ingarchilik natijasida 20 mm yomg‘ir yog‘di va bu aprel oyi uchun belgilangan umumiy meʼyorning, yaʼni 60 mmning uchdan bir qismiga teng. Lotoklar bir paytning o‘zida bunday katta oqimni qabul qilishga mo‘ljallanmagani bois, shahrimizdagi bir necha manzilgohlarda suv to‘planishi kuzatildi.
Bu holatni tezkorlik bilan bartaraf etish maqsadida, Toshkent shahar Obodonlashtirish bosh boshqarmasi va uning tuman boshqarmalari, kommunal soha tizimlari, Favqulodda vaziyatlar boshqarmasi hamda Ichki ishlar bosh boshqarmasining 500 dan ortiq xodimlari va 100 dan ortiq maxsus texnikalari jalb etilib, 23:00 gacha barcha manzillardagi holatlar bartaraf etildi”, — deya izoh bergan hokimlik axborot xizmati.
Izoh (0)