“Hamkasblarim men bilan so‘rashmay qo‘ygan paytlari ham bo‘ldi”. Ozoda Nursaidova 13 yil davomida “zapret”da bo‘lgani haqida (video)

Ozoda Nursaidova “zapret”da yurgan paytlarida ayrim hamkasblarining unga bo‘lgan munosabati o‘zgargani haqida so‘zlab berdi. Xonanda bu haqda Navoiy shahrida bo‘lib o‘tgan “Konstitutsiya o‘zimizniki” shiori ostidagi targ‘ibot tadbirida gapirdi.



“Mana 13 yil ‘zapret’ degan tushuncha bo‘lardi. San’atkor uchun ‘zapret’ degan tushuncha juda og‘ir edi. Hamkasblarimiz ham biz bilan so‘rashmay qo‘ygan kunlar bo‘lgandi. Bular hammasi o‘tmishda qoldi, Xudoga shukur. Mana hozir sizlarga bemalol qo‘shiq kuylay olyapmiz. Qilingan yaxshi ishlarni e’tirof qilishimiz shart. Ularga shukronalik qilishimiz shart. Men shular toifasidanman. Albatta, hayotimdagi o‘zgarishlar uchun kattakon rahmat aytaman.

2016-yilda hamma san’atkorlarning ‘zapreti’ yechildida, meniki qolib ketdi. Men nimaga bunaqa, deb o‘ylardim. Keyin esimga tushdi, 2013-yilda men bir intervyu bergandim. Yakkasaroy tumanida turaman. Yakkasaroy tuman hokimligidan odam keldi. ‘Ozoda opa, uyizni buzamiz’, deb buldozer olib keldi. Bu 2013-yildagi gaplar. ‘Zapret’da, umidsizlikda siqilib yurgan paytlarim. O‘shanda emotsiyalarga berilib intervyu berganman. Endi men nima demoqchiman, 2016-yilda hamma ‘zapret’dan chiqib, men qolib ketganimga o‘sha intervyu sabab bo‘lsa kerak, deb o‘yladim.

Yo‘q, vaqt o‘tib, mengayam yo‘l ochildi. Nima demoqchiman, mana shu inson mardligi tufayli hech narsaga qaramay, sahnani menga qaytarib berdi, xalqqa meni qaytarib berdi. Men mingdan ming minnatdorman. Sizlarning nomingizdan ham minnatdorchilik bildiraman. Inson qadri ulug‘lanayotgan yurtda yashayapmiz. Men shaxsan O‘zbekiston taqdiriga, O‘zbekiston Konstitutsiyasi taqdiriga befarq emasman”, — deydi Ozoda Nursaidova.