“Ҳамкасбларим мен билан сўрашмай қўйган пайтлари ҳам бўлди”. Озода Нурсаидова 13 йил давомида “запрет”да бўлгани ҳақида (видео)

Озода Нурсаидова “запрет”да юрган пайтларида айрим ҳамкасбларининг унга бўлган муносабати ўзгаргани ҳақида сўзлаб берди. Хонанда бу ҳақда Навоий шаҳрида бўлиб ўтган “Конституция ўзимизники” шиори остидаги тарғибот тадбирида гапирди.



“Мана 13 йил ‘запрет’ деган тушунча бўларди. Санъаткор учун ‘запрет’ деган тушунча жуда оғир эди. Ҳамкасбларимиз ҳам биз билан сўрашмай қўйган кунлар бўлганди. Булар ҳаммаси ўтмишда қолди, Худога шукур. Мана ҳозир сизларга бемалол қўшиқ куйлай оляпмиз. Қилинган яхши ишларни эътироф қилишимиз шарт. Уларга шукроналик қилишимиз шарт. Мен шулар тоифасиданман. Албатта, ҳаётимдаги ўзгаришлар учун каттакон раҳмат айтаман.

2016 йилда ҳамма санъаткорларнинг ‘запрет’ ечилдида, меники қолиб кетди. Мен нимага бунақа, деб ўйлардим. Кейин эсимга тушди, 2013 йилда мен бир интервью бергандим. Яккасарой туманида тураман. Яккасарой туман ҳокимлигидан одам келди. ‘Озода опа, уйизни бузамиз’, деб бульдозер олиб келди. Бу 2013 йилдаги гаплар. ‘Запрет’да, умидсизликда сиқилиб юрган пайтларим. Ўшанда эмоцияларга берилиб интервью берганман. Энди мен нима демоқчиман, 2016 йилда ҳамма ‘запрет’дан чиқиб, мен қолиб кетганимга ўша интервью сабаб бўлса керак, деб ўйладим.

Йўқ, вақт ўтиб, менгаям йўл очилди. Нима демоқчиман, мана шу инсон мардлиги туфайли ҳеч нарсага қарамай, саҳнани менга қайтариб берди, халққа мени қайтариб берди. Мен мингдан минг миннатдорман. Сизларнинг номингиздан ҳам миннатдорчилик билдираман. Инсон қадри улуғланаётган юртда яшаяпмиз. Мен шахсан Ўзбекистон тақдирига, Ўзбекистон Конституцияси тақдирига бефарқ эмасман”, — дейди Озода Нурсаидова.