O‘zbekistonda davlat dasturlariga ajratilgan qariyb 21 trillion so‘m mablag‘ning maqsadli sarflanishi va ishlar sifati yuzasidan tizimli nazorat o‘rnatilgan. Bu haqda bosh prokuratura bo‘lim prokurori Farrux Sultonov ma’lum qildi.
Uning so‘zlariga ko‘ra, shuningdek, “Tashabbusli budjet” jarayonlarining birinchi mavsumida tasdiqlangan 1 666 ta loyihani amalga oshirish uchun yo‘naltirilayotgan 1 trillion 571 milliard so‘m mablag‘ning maqsadli sarflanishi nazorat qilib boriladi.
Bundan tashqari, dasturlar ijro etilishini nazorat qilish va muvofiqlashtirish bo‘yicha Respublika va hududiy shtablar hamda ishchi guruhlar faoliyati yo‘lga qo‘yilgan. Shtablar tomonidan Investitsiya dasturidagi 1 378 ta, “Yangi O‘zbekiston” massivlaridagi 827 ta va mahallalar infratuzilmasini rivojlantirish dasturidagi 6 007 ta loyihaning har biri monitoringga olingan.
2023-yilning o‘tgan davri mobaynida mahallalar infratuzilmasini rivojlantirish dasturi doirasida ko‘rilgan chora-tadbirlar natijasida 3 238 ta obyektda qurilish ishlar yakunlanib, foydalanishga topshirilgan. Jumladan, 514 ta ichimlik va oqova suv taʼminoti, 328 ta elektr tarmog‘i, 54 ta gaz taʼminoti, 104 ta ijtimoiy soha va 428 ta boshqa turdagi obyektlarda qurilish-taʼmirlash ishlari yakunlangan.
Ta’kidlanishicha, prokuratura organlarida joriy etilgan “Budjet nazorati” elektron dasturi orqali barcha obyektlar bo‘yicha onlayn monitoring yo‘lga qo‘yilgan. Internetda ochilgan maxsus kanal va prokuratura organlarida ishga tushirilgan “ochiq telefon” orqali esa keng jamoatchilik uchun dasturlar ijrosining borishini muhokama qilish imkoni yaratilgan.
“Tashabbusli budjet” jarayonlarining birinchi mavsumi g‘olib loyihalari 7-aprel kuni “Ochiq budjet” axborot portalida e’lon qilindi. Ovoz berish yakunlariga ko‘ra, O‘zbekiston bo‘ylab tasdiqlangan 33 680 ta loyihadan 1 666 tasi g‘olib deb topildi. Ushbu loyihalarda keltirilgan tashabuslarni amalga oshirish uchun 1 trillion 571 milliard 963 million so‘m mablag‘ yo‘naltiriladi. O‘z navbatida Iqtisodiyot va moliya vazirligi mazkur jarayonda ishtirok etgan barcha fuqarolarga minnatdorchilik bildirib, “Tashabbusli budjet” loyihasining keyingi mavsum jarayonlarida faol bo‘lishga chaqirdi.
Izoh (0)