AQSHning bir qator yirik kreditorlari yopilishi ortidan so‘nggi ikki hafta ichida AQSH banklarining kreditlari 105 mlrd dollarga kamaydi. Bu haqda Bloomberg xabar bermoqda.
Federal rezerv ma’lumotlariga ko‘ra, mazkur ko‘rsatkich 1973-yildan beri eng katta pasayishdir.
O‘tgan haftada kreditlar qisqarishi 45 milliard dollarni tashkil etdi. Bu birinchi navbatda kichik banklar tomonidan berilgan kreditlar hajmining qisqarishi bilan bog‘liq.
10-mart kuni AQSHning 16-yirik banki SVB bankrotlik to‘g‘risida ariza bergandi. Uning ortidan Nyu-Yorkdagi Signature Bank ham bankrot deb e’lon qildi.
Bu AQSH tarixidagi uchinchi yirik bank inqiroziga aylandi. SVB va Signature Bank qulaganidan keyingi bir hafta ichida AQSHning boshqa banklari bank bozoridagi xavotirlar fonida AQSH Federal rezerv tizimidan rekord darajada 165 milliard dollar qarz oldi.
7 aprel kuni JPMorgan rahbari Jeymi Daymon eng yirik banklarning bankrotligi fonida AQSH fuqarolari kreditlash hajmini kamaytirayotgani, bu Amerika iqtisodiyotida yuzaga kelishi mumkin bo‘lgan retsessiya belgisi bo‘lishi mumkinligini aytdi.
AQSH moliya vaziri Janet Yellen yaqinlashib kelayotgan retsessiya haqidagi mish-mishlarga qaramay, mamlakat iqtisodiyoti o‘sishi va inflyatsiya pasayishiga ishonishda davom etmoqda.
Izoh (0)