Iqtisodiy tadqiqotlar va islohotlar markazi tomonidan 2023-yil birinchi chorak uchun “Banklar faollik indeksi” hisoblandi va ushbu indeksga asosan banklarning reytingi yangilandi. Bu haqda Markaz matbuot xizmati “Daryo”ga ma’lum qildi.
Mazkur indeks mamlakatdagi 29 ta banklar uchun, banklarning hajmiga qarab katta (17 ta) va kichik (12 ta) banklarga guruhlangan holda hisoblangan.
Yirik banklar reytingida “Kapitalbank” yetakchilikni saqlab qolgan bo‘lsa, “Aziya Alyans” bank 1 pog‘onaga ko‘tarilib, reytingning 3-pog‘onasiga tushgan “Hamkorbank” bilan o‘rin almashdi.
“Trast bank” ketma-ket uchinchi chorak uchun reytingda o‘z mavqeini yo‘qotmoqda. Ushbu bank yana 1 pog‘onaga pastladi va 5-o‘rinni egallab, “Ipak yo‘li bank”ka o‘z o‘rnini bo‘shatib berdi.
Shu bilan birga, “Ipoteka bank” va “Milliy bank” 2 pog‘onaga, “Xalq bank”, “Oriyent Finans bank” va “Asaka Bank” 1 pog‘onaga ko‘tarilgan bo‘lsa, “Invest Finans bank” va “Agrobank” bir yo‘la 3 pog‘onaga, “Turon Bank” 1 pog‘onaga pastlagan, qolgan banklar o‘z o‘rinlarini saqlab qolishgan.
Davlat ulushi mavjud yirik banklardan faqat “Agrobank” va “Turon bank” pastladi va mutanosib ravishda 14-o‘rinni hamda 17-o‘rinni egalladi.
Shu bilan birga “Agrobank” mazkur chorakda faqat kapital yetarlilik va likvidlilik ko‘rsatkichi bo‘yicha pastlagan bo‘lsa, “Turon bank” daromad olish salohiyati ko‘rsatkichi sezilarli pasaygan.
Davlat ulushi mavjud yirik banklardan “Ipoteka bank” 2 pog‘onaga ko‘tarilib, 7-o‘rinni egalladi. Bank mazkur chorakda aktivlari sifati ko‘rsatkichi bo‘yicha pastlagan bo‘lsa, kapital yetarliligi, likvidlilik hamda boshqaruv samaradorligi ko‘rsatkichlari o‘sgan. Biroq Moliya vazirligidan olingan depozitlar va kreditlar miqdorini o‘z majburiyatlariga nisbati yuqoriligicha qolmoqda.
Kichik banklar reytingida “Davr bank”, “Universal bank” va “Ziraat bank” yetakchi o‘rinlarni saqlab qolgan bo‘lsa, “TB bank” 2 pog‘onaga ko‘tarilib 4-o‘rinni egallagan.
TBC bank kapital yetarliligi bo‘yicha ko‘rsatkichi sezilarli pasaygan bo‘lsa-da, daromad olish salohiyati hamda boshqaruv samaradorligi ko‘rsatkichlarining yaxshilanishi reytingdagi o‘rni ko‘tarilishiga sabab bo‘ldi.
Tenge bank, Anor bank, “Poytaxt bank” va “O‘zagroeksport bank” 1 pog‘onaga pasaydi. Shu bilan bir vaqtda, Madad invest bank va “Garant bank” 1 pog‘onadan ko‘tarildi.
“Ravnaq bank” va “O‘zKDB” o‘tgan davrga nisbatan o‘z mavqelarini saqlab qoldi.
Izoh (0)