АҚШнинг бир қатор йирик кредиторлари ёпилиши ортидан сўнгги икки ҳафта ичида АҚШ банкларининг кредитлари 105 млрд долларга камайди. Бу ҳақда Bloomberg хабар бермоқда.
Федерал резерв маълумотларига кўра, мазкур кўрсаткич 1973 йилдан бери энг катта пасайишдир.
Ўтган ҳафтада кредитлар қисқариши 45 миллиард долларни ташкил этди. Бу биринчи навбатда кичик банклар томонидан берилган кредитлар ҳажмининг қисқариши билан боғлиқ.
10 март куни АҚШнинг 16-йирик банки SVB банкротлик тўғрисида ариза берганди. Унинг ортидан Нью-Йоркдаги Signature Bank ҳам банкрот деб эълон қилди.
Бу АҚШ тарихидаги учинчи йирик банк инқирозига айланди. SVB ва Signature Bank қулаганидан кейинги бир ҳафта ичида АҚШнинг бошқа банклари банк бозоридаги хавотирлар фонида АҚШ Федерал резерв тизимидан рекорд даражада 165 миллиард доллар қарз олди.
7 апрель куни JPMorgan раҳбари Жейми Даймон энг йирик банкларнинг банкротлиги фонида АҚШ фуқаролари кредитлаш ҳажмини камайтираётгани, бу Америка иқтисодиётида юзага келиши мумкин бўлган рецессия белгиси бўлиши мумкинлигини айтди.
АҚШ молия вазири Жанет Йеллен яқинлашиб келаётган рецессия ҳақидаги миш-мишларга қарамай, мамлакат иқтисодиёти ўсиши ва инфляция пасайишига ишонишда давом этмоқда.
Изоҳ (0)