Қашқадарё вилояти Мактабгача ва мактаб таълими бошқармаси “Деҳқонобод тумани мактабгача ва мактаб таълими бўлими томонидан ходимларига ғайриқонуний топшириқ берилмоқда”, мазмунидаги мурожаатга муносабат билдириб, ҳолат назоратга олинганини маълум қилди.
“Дарё” вилоят Мактабгача ва мактаб таълими бошқармаси ахборот хизмати раҳбари Жавоҳир Рустамов билан боғланиб, бўлим бошлиғининг ғайриқонуний топшириғи ҳақида сўради.
“Бу мурожаат ҳали ижтимоий тармоқларда эълон қилинмаган. Кобул Дусов ва бир нечта мурожаатлар бошқармага мурожаат қилиб, бўлим бошлиғи мактаб директорларидан иборат раҳбариятга ишга қачон келгани ва кетганини билиш учун раҳбариятнинг ишга борган пайти ва ишдан қайтаётган пайтини билиш учун фотосурат тақдим қилишини сўраган. Шу сабаб мазкур ҳолат назоратга олиниб, бўлим бошлиғига бундайин топшириқ бермаслик тўғрисидаги тушунтирилди”, — дейди Жавоҳир Рустамов.
Қашқадарё вилояти Мактабгача ва мактаб таълими бошқармаси бошлиғи Убайдулла Орипов “Дарё” журналисти билан суҳбатида бўлим бошлиғи билан гаплашиб, нега бундай топшириқ бергани ҳақида сўраганини билдирди.
“Бўлим бошлиғи янги тайинлангани боис, туман марказидан чекка ҳудудлардаги мактаблардаги ҳолатни тартибга солиш учун мактаб раҳбариятидан иборат жамоага — мактаб директори, ўринбосарлари ва бошқа масъулларга ишга ўз вақтида келиб, иш пайтида мактабда бўлиши кераклигини тайинлаган ва буни исботловчи фотосуратлар сўраган. Бўлим бошлиғининг мактаб раҳбариятидан масъулият талаб қилиши тўғри ва асосли. Бироқ буни бошқача усулда назорат қилиши лозимлигини тушунтирдик”, — дейди вилоят мактабгача ва мактаб таълими бошқармаси бошлиғи Убайдулла Орипов.
Деҳқонобод туман мактабгача ва мактаб таълими бўлими бошлиғи Холиёр Менглиев ҳам бундай топшириқ беришига асоси борлигини, мактаблардаги ҳолат назоратдан чиқиб кетганини айтмоқда.
“Янги иш бошлаганимдан сўнг имкон қадар чекка ҳудудларда бўлиб, таълим сифати, раҳбарлар масъулиятини ўрганишга ҳаракат қиляпман. Кузатувларимдан маълум бўлишича, чекка ҳудудлардаги аксарият мактабларда раҳбарият ўз вақтида ишга келмаслиги, иш вақти тугамасдан мактабдан кетиб қолиш ҳолатлари кўпайган. Бу эса мактабда назорат сусайишига, ўқитувчиларнинг ҳам ўз вақтида мактабга келиб-кетиши издан чиққанини кўрсатди. Шуни тартибга олиш мақсадида мактаб раҳбариятига ишга келган пайти ва кетиш вақтида фотосуратга тушиб, менга юборишларини сўрагандим. Бундан кўзланган мақсад фақатгина барча раҳбариятнинг ўз вақтида мактабга келиб, ўз вақтида кетишига эришиш эди. Биласиз, бир инсон бир вақтнинг ўзида барча тумандаги мактабларни назорат қилолмайди. Қолаверса, Деҳқонобод туманидаги мактаблар туман марказидан 200-250 километр узоқликда жойлашган. Ушбу мактабларда ҳам тартиб ва назорат бўлишини таъминлаш мақсадида шундай ишга қўл урилган. Бу мактаб раҳбарларига малол келса, унда назорат қилишнинг уларга маъқул йўлини излаймиз. Лекин барибир тартиб ва интизомни назоратга олмасак бўлмайди. Зеро ёшларнинг сифатли таълим олиши мен ва менинг жамоам елкасига юклатилган масъулият. Буни виждонан адо этишим, олаётган маошимни ҳалолаб олишим керак”, — дейди мактаб раҳбариятига ғайриқонуний топшириқ бергани айтилган масъул.
Изоҳ (0)