Ukraina prezidenti Vladimir Zelenskiy Kiyev viloyatining Chayki qishlog‘ida joylashgan Qrim musulmonlarining “Birlik” markazidagi iftorlikka tashrif buyurdi.
Musulmon harbiy xizmatchilar, Turkiyaning Kiyevdgi elchisi va Qrim-tatar xalq majlisi vakillari ishtirokidagi iftorlikda Zelenskiy bu yilgi ramazon oyidan Ukrainada yangi anʼana boshlanishini aytdi.
“Bugundan biz Ukraina uchun ana shunday an’anani boshlaymiz – qahramonlarimiz, musulmon askarlari, qrim-tatar xalqi Majlisi, Ukrainaning butun musulmon jamoatchiligi vakillari bilan birgalikda rasmiy darajada iftorlik o‘tkazamiz. Bu bilan shuni tasdiqlaymizki, Ukraina har bir insonni, har bir jamoatchilikni qadrlaydi”, — dedi Zelenskiy.
Uning ta’kidlashicha, hurmat bilan mustahkamlangan xilma-xillik mustaqil Ukrainaga xos xususiyatning bir qismidir.
“Shunday xususiyatimiz hamisha mustahkamlanib, faqat ezgu ishlarga yo‘naltirilsin”, — dedi Zelenskiy hamda ukrainlar bilan tinchlikni yovuzlikdan himoya qilishga intilayotgan musulmonlar va butun dunyo musulmonlari jamoasidan minnatdorligini bildirdi.
Tadbirda Zelenskiy Ukraina suvereniteti va hududiy yaxlitligi uchun janglarda o‘zini ko‘rsatgan askarlarga mukofotlar topshirdi.
Izoh (0)