Зеленский мусулмон ҳарбийлар ва қрим-татар фаоллари билан ифторликда иштирок этди (фото,видео)

Украина президенти Владимир Зеленский Киев вилоятининг Чайки қишлоғида жойлашган Қрим мусулмонларининг “Бирлик” марказидаги ифторликка ташриф буюрди.

Мусулмон ҳарбий хизматчилар, Туркиянинг Киевдги элчиси ва Қрим-татар халқ мажлиси вакиллари иштирокидаги ифторликда Зеленский бу йилги рамазон ойидан Украинада янги анъана бошланишини айтди.

“Бугундан биз Украина учун ана шундай анъанани бошлаймиз – қаҳрамонларимиз, мусулмон аскарлари, қрим-татар халқи Мажлиси, Украинанинг бутун мусулмон жамоатчилиги вакиллари билан биргаликда расмий даражада ифторлик ўтказамиз. Бу билан шуни тасдиқлаймизки, Украина ҳар бир инсонни, ҳар бир жамоатчиликни қадрлайди”, — деди Зеленский.

Унинг таъкидлашича, ҳурмат билан мустаҳкамланган хилма-хиллик мустақил Украинага хос хусусиятнинг бир қисмидир.

“Шундай хусусиятимиз ҳамиша мустаҳкамланиб, фақат эзгу ишларга йўналтирилсин”, — деди Зеленский ҳамда украинлар билан тинчликни ёвузликдан ҳимоя қилишга интилаётган мусулмонлар ва бутун дунё мусулмонлари жамоасидан миннатдорлигини билдирди.

Тадбирда Зеленский Украина суверенитети ва ҳудудий яхлитлиги учун жангларда ўзини кўрсатган аскарларга мукофотлар топширди.