Minsk viloyat sudi Belarus prezidentligiga sobiq nomzod Valeriy Sepkaloni sirtdan 17 yilga qattiq rejimdagi koloniyaga hukm qildi, deb xabar bermoqda “Belta”.
Sud Sepkaloni bir qator jinoiy moddalar, jumladan, katta miqdorda pora olish moddasi bo‘yicha aybdor deb topdi.
Avvalroq “Zerkalo ” nashri Sepkalo hukumatni ag‘darishga chaqirish, ekstremistik tuzilmani yaratish va moliyalashtirish, shuningdek, Aleksandr Lukashenkoga nisbatan ommaviy haqorat va tuhmat kabi 9 ta modda bo‘yicha ayblanganini yozgan edi. Prokurotura Sepkalo uchun 19 yil qamoq jazosini so‘ragan.
Valeriy Sepkalo 2020-yilda Belarusda bo‘lib o‘tgan prezidentlik saylovlarida qatnashmoqchi edi, ammo o‘shanda Markaziy saylov komissiyasi uni nomzod sifatida ro‘yxatga olishdan bosh tortdi, shundan so‘ng Sepkalo hibsga olinishidan qo‘rqib, mamlakatni tark etdi.
Uning rafiqasi Veronika Sepkalo esa prezidentlikka nomzod Svetlana Tixanovskaya va Mariya Kolesnikova bilan birlashib, Aleksandr Lukashenkoga qarshi chiqqan “ayollar uchligi”ni tashkil qildi.
Saylovdan keyin Tixanovskaya va Sepkalo hukumat bosimi ostida Belarusni tark etdi. Kolesnikova 2020-yil sentabrida hibsga olindi. Bir yil o‘tgach, u hokimiyatni egallab olish uchun fitna uyushtirish, Belarus milliy xavfsizligiga tahdid soluvchi harakatlarga chaqirish, shuningdek, ekstremistik tuzilmani yaratishda aybdor deb topilib, 11 yillik qamoq jazosiga hukm qilindi.
2023-yil mart oyida Minsk sudi Svetlana Tixanovskayani sirtdan 15 yilga ozodlikdan mahrum qildi.
Shuningdek, 2021-yilda Belarus Oliy sudi Viktor Babarikoni 14 yillik koloniyaga hukm qilgan edi. Viktor Babariko 2020-yilda Belarus prezidentligi uchun nomzodini qo‘ygan va Lukashenkoning asosiy raqibi bo‘lgan.
2023-yil yanvarida esa yana bir sobiq nomzod Andrey Dmitriyev hibsga olindi.
Izoh (0)