O‘zLiDePning navbatdagi event tadbiri Kosonsoy tumanida bo‘lib o‘tdi. Partiya Namangan viloyat hamda Kosonsoy tuman kengashlari tashabbusi bilan uyushtirilgan navbatdagi tadbirda tadbirkor, fermer, xotin-qizlar va yoshlar qatnashdi.
Unda O‘zLiDeP Siyosiy Kengashi Ijroiya qo‘mitasi raisi Aktam Xaitov, Oliy Majlis Senati aʼzosi Ikromxon Najmiddinov, Oliy Majlis Qonunchilik palatasi deputatlari Zafar Xudayberdiyev, Barno Mirzamova, Sardor G‘iyosov, partiya viloyat kengashi raisi Solixon Mo‘minov, apparat rahbari Orifjon Mahmudov ishtirok etib, konstitutsiyaviy qonun loyihasi haqida o‘z fikr-mulohazalarini bildirishdi.
- Inson qadri va haq-huquqlari qadrlangan jamiyatda inson erkinligi yuksaladi, erkin faoliyat uchun zarur asoslar yaratiladi, – dedi O‘zLiDeP Siyosiy Kengashi Ijroiya qo‘mitasi raisi Aktam Xaitov. – Konstitutsiyamizning birinchi moddasidayoq O‘zbekiston ijtimoiy davlat deb eʼlon qilinmoqda. Davlatning ijtimoiy majburiyatlariga oid normalar qariyb uch baravarga ortmoqda.
Masalan, har kimning uy-joyli bo‘lish huquqi belgilanmoqda. Ushbu normaning amal qilishi har bir fuqaro, jumladan, yosh oilalarning o‘z boshpanasiga ega bo‘lishini taʼminlab, kishilarning hayotdan rozilik darajasini oshiradi.
Maʼlumot uchun: o‘tgan yili mamlakatimizda 50 ming oila uchun yangi kvartiralar olishga sharoit yaratib berilgan bo‘lsa, bu yil 90 ming oilani uy-joyli qilish marrasi olingan. Yaqin 2-3 yilda esa bu raqamni 200 mingga yetkazish ustida ishlanmoqda.
Bundan tashqari, hech kim sudning qarorisiz va qonunga zid tarzda uy-joyidan mahrum etilishi mumkin emasligi, uy-joyidan mahrum etilgan mulkdorga uy-joyning qiymati hamda u ko‘rgan zararlarning o‘rni qonunda nazarda tutilgan hollarda va tartibda oldindan hamda teng qiymatda (bozor qiymatida) qoplanishi taʼminlanishi kafolatlanmoqda.
Tadbirkorlarimiz buning ahamiyatini hammadan ko‘ra ko‘proq his qilishi, demakki aynan shu imkoniyatlarni yaratib berayotgan yangi konstitutsion normalarni to‘la qo‘llab quvvatlashlari aniq, dedi so‘zga chiqqan partiya viloyat kengashi raisi Solixon Mo‘minov barchani bo‘lajak referendumda faol bo‘lishga chaqirar ekan.
Shundan so‘ng ishtirokchilarning gulduros qarsaklari atrofni tutib ketdi. “Konstitutsiya meniki, sizniki, xammamizniki!” degan chaqiriqlar tadbirga ko‘tarinki kayfiyat bag‘ishladi.
Namangan shahridagi “Barkamol avlod” kichik sanoat zonasida yangilanayotgan Bosh qomusimiz targ‘ibotiga bag‘ishlangan tadbirda tadbirkorik subyekti vakillari jam bo‘ldi.
Unda O‘zLiDeP Siyosiy Kengashi Ijroiya qo‘mitasi raisi Aktam Xaitov va partiya faollari ishtirok etdi. Dastlab tashviqot guruhi aʼzolari bu yerda faoliyat yuritayotgan “Gaymur tekstil 2020”, “Balans Teks” va “Master Klass” MCHJlarda bo‘lishdi, ishchi-xodimlar bilan suhbatlashishdi.
Muloqot jarayonida yangi tahrirdagi Konstitutsiyada tadbirkorlar, fermerlar uchun ko‘plab huquqiy imkoniyatlar yaratilayotgani, davlat o‘z zimmasiga bozor munosabatlarini rivojlantirish, qulay investitsiyaviy va ishbilarmonlik muhitini taʼminlash, halol raqobat uchun shart-sharoitlar yaratish bo‘yicha majburiyatlar olayotganligi aytildi.
Barcha mulk shakllarining teng huquqliligi, tadbirkorlarning qonunchilikka muvofiq har qanday faoliyatni mustaqil tanlashi va amalga oshirishga haqliligi kafolanayotganini eshitgan biznes subyekt vakillari xursandchiliklarini yashirishmadi.
- Har qanday tadbirkorlik jamiyatdagi tinchlik va xotirjamlik, aholining rozilik kayfiyati, qolaversa, huquq ustuvorligi taʼminlanganiga bog‘liqligini hamma yaxshi anglaydi, – dedi partiya lideri. – Shunday ekan, partiyamiz uchun, uning elektorati bo‘lmish tadbirkor, mulkdor va fermerlar uchun yangilanayotgan konstitutsiyada aholi turli qatlamlarining ijtimoiy himoya qilinishiga oid normalar, qolaversa, huquq ustuvorligini taʼminlash, inson huquq va manfaatlarini yanada ishonchli himoya qilishga qaratilgan yangi qoidalarning aks etayotgani nihoyatda muhim ahamiyatga molik. Aynan ushbu yo‘nalishdagi o‘zgarishlar yangilanayotgan Konstitutsiyaning tub mohiyati, o‘zak-negizini belgilamoqda.
Tadbir yakunida ishtirokchilar bo‘lajak referendumda faol ishtirok etish va yangilanayotgan konstitutsiya loyihasini o‘z ovozlari bilan maʼqullashlarini bildirishdi.
Ma’lumotlar sheriklik huquqi asosida tayyorlandi
Izoh (0)