O‘zbekiston Fanlar akademiyasi akademigi Habibulla Akbarov 8-aprel kuni 87 yoshida vafot etdi. Bu haqda Oliy ta’lim, fan va innovatsiyalar vazirligi xabar berdi.
Habibulla Akbarov fan arbobi, geologiya sohasida yirik olim, ko‘plab shogirdlarning ustozi edi. U 1936-yilda Toshkent shahrida tug‘ilgan. 1958-yilda O‘rta Osiyo politexnika institutining geologiya-qidiruv fakultetini tugatgan.
Faoliyati davomida O‘rta Osiyo geologiya va mineral xomashyo institutida sektor mudiri (1968-79), bo‘lim boshlig‘i (1979-86), direktor o‘rinbosari (1987–91), 1992–96-yillarda ToshDTU prorektori va ayni shu vaqtda universitetning foydali qazilma konlari kafedrasi mudiri lavozimlarida ishlagan. 1996-yildan O‘zbekiston Fanlar akademiyasi Yer haqidagi fanlar bo‘limi raisi va Fanlar akademiyasi prezidiumi a’zosi (1997-yildan) sifatida faoliyat yuritgan.
Atoqli olimning endogen ruda konlari va maydonlarini o‘rganish, ularni izlashga bag‘ishlab yozgan ko‘plab maqola va risolalari, ilmiy ixtirolari soha mutaxassislari va ilmiy jamoatchilikka yaxshi ma’lum.
Eslatib o‘tamiz, 2022-yil 8-dekabrda Genetika va o‘simliklar eksperimental biologiyasi sohasida dunyoga tanilgan olim akademik Abdumavlon Abdullayev 92 yoshida vafot etgandi. Undan oldinroq esa akademik Turg‘unpo‘lat Daminov 81 yoshida olamdan o‘tgan edi.
Izoh (0)