ЎзЛиДеПнинг навбатдаги эвент тадбири Косонсой туманида бўлиб ўтди. Партия Наманган вилоят ҳамда Косонсой туман кенгашлари ташаббуси билан уюштирилган навбатдаги тадбирда тадбиркор, фермер, хотин-қизлар ва ёшлар қатнашди.
Унда ЎзЛиДеП Сиёсий Кенгаши Ижроия қўмитаси раиси Актам Хаитов, Олий Мажлис Сенати аъзоси Икромхон Нажмиддинов, Олий Мажлис Қонунчилик палатаси депутатлари Зафар Худайбердиев, Барно Мирзамова, Сардор Ғиёсов, партия вилоят кенгаши раиси Солихон Мўминов, аппарат раҳбари Орифжон Маҳмудов иштирок этиб, конституциявий қонун лойиҳаси ҳақида ўз фикр-мулоҳазаларини билдиришди.
- Инсон қадри ва ҳақ-ҳуқуқлари қадрланган жамиятда инсон эркинлиги юксалади, эркин фаолият учун зарур асослар яратилади, – деди ЎзЛиДеП Сиёсий Кенгаши Ижроия қўмитаси раиси Актам Хаитов. – Конституциямизнинг биринчи моддасидаёқ Ўзбекистон ижтимоий давлат деб эълон қилинмоқда. Давлатнинг ижтимоий мажбуриятларига оид нормалар қарийб уч бараварга ортмоқда.
Масалан, ҳар кимнинг уй-жойли бўлиш ҳуқуқи белгиланмоқда. Ушбу норманинг амал қилиши ҳар бир фуқаро, жумладан, ёш оилаларнинг ўз бошпанасига эга бўлишини таъминлаб, кишиларнинг ҳаётдан розилик даражасини оширади.
Маълумот учун: ўтган йили мамлакатимизда 50 минг оила учун янги квартиралар олишга шароит яратиб берилган бўлса, бу йил 90 минг оилани уй-жойли қилиш марраси олинган. Яқин 2-3 йилда эса бу рақамни 200 мингга етказиш устида ишланмоқда.
Бундан ташқари, ҳеч ким суднинг қарорисиз ва қонунга зид тарзда уй-жойидан маҳрум этилиши мумкин эмаслиги, уй-жойидан маҳрум этилган мулкдорга уй-жойнинг қиймати ҳамда у кўрган зарарларнинг ўрни қонунда назарда тутилган ҳолларда ва тартибда олдиндан ҳамда тенг қийматда (бозор қийматида) қопланиши таъминланиши кафолатланмоқда.
Тадбиркорларимиз бунинг аҳамиятини ҳаммадан кўра кўпроқ ҳис қилиши, демакки айнан шу имкониятларни яратиб бераётган янги конституцион нормаларни тўла қўллаб қувватлашлари аниқ, деди сўзга чиққан партия вилоят кенгаши раиси Солихон Мўминов барчани бўлажак референдумда фаол бўлишга чақирар экан.
Шундан сўнг иштирокчиларнинг гулдурос қарсаклари атрофни тутиб кетди. “Конституция меники, сизники, хаммамизники!” деган чақириқлар тадбирга кўтаринки кайфият бағишлади.
Наманган шаҳридаги “Баркамол авлод” кичик саноат зонасида янгиланаётган Бош қомусимиз тарғиботига бағишланган тадбирда тадбиркорик субъекти вакиллари жам бўлди.
Унда ЎзЛиДеП Сиёсий Кенгаши Ижроия қўмитаси раиси Актам Хаитов ва партия фаоллари иштирок этди. Дастлаб ташвиқот гуруҳи аъзолари бу ерда фаолият юритаётган “Гаймур текстиль 2020”, “Баланс Текс” ва “Мастер Класс” МЧЖларда бўлишди, ишчи-ходимлар билан суҳбатлашишди.
Мулоқот жараёнида янги таҳрирдаги Конституцияда тадбиркорлар, фермерлар учун кўплаб ҳуқуқий имкониятлар яратилаётгани, давлат ўз зиммасига бозор муносабатларини ривожлантириш, қулай инвестициявий ва ишбилармонлик муҳитини таъминлаш, ҳалол рақобат учун шарт-шароитлар яратиш бўйича мажбуриятлар олаётганлиги айтилди.
Барча мулк шаклларининг тенг ҳуқуқлилиги, тадбиркорларнинг қонунчиликка мувофиқ ҳар қандай фаолиятни мустақил танлаши ва амалга оширишга ҳақлилиги кафоланаётганини эшитган бизнес субъект вакиллари хурсандчиликларини яширишмади.
- Ҳар қандай тадбиркорлик жамиятдаги тинчлик ва хотиржамлик, аҳолининг розилик кайфияти, қолаверса, ҳуқуқ устуворлиги таъминланганига боғлиқлигини ҳамма яхши англайди, – деди партия лидери. – Шундай экан, партиямиз учун, унинг электорати бўлмиш тадбиркор, мулкдор ва фермерлар учун янгиланаётган конституцияда аҳоли турли қатламларининг ижтимоий ҳимоя қилинишига оид нормалар, қолаверса, ҳуқуқ устуворлигини таъминлаш, инсон ҳуқуқ ва манфаатларини янада ишончли ҳимоя қилишга қаратилган янги қоидаларнинг акс этаётгани ниҳоятда муҳим аҳамиятга молик. Айнан ушбу йўналишдаги ўзгаришлар янгиланаётган Конституциянинг туб моҳияти, ўзак-негизини белгиламоқда.
Тадбир якунида иштирокчилар бўлажак референдумда фаол иштирок этиш ва янгиланаётган конституция лойиҳасини ўз овозлари билан маъқуллашларини билдиришди.
Маълумотлар шериклик ҳуқуқи асосида тайёрланди
Изоҳ (0)