Boji nollashtirilgan 36 turga kiruvchi mahsulotlar: arzonlashmoqda, ko‘paymoqda, talab qondirilmoqda

Prezident Shavkat Mirziyoyevning 23-martdagi “Iste’mol bozorlarida narxlar barqarorligini ta’minlashga doir qo‘shimcha chora-tadbirlar to‘g‘risida”gi farmoni qabul qilingan edi. Bugun, 8-aprel kuni Xalqaro biznes markazida bir qator vazirlik va idoralar rahbarlari, yirik importyorlar, ulgurji va chakana savdo tarmoqlari egalari, O‘zbekistonning taniqli tadbirkorlari ishtirokida farmonning ijrosi yuzasidan davra suhbati bo‘lib o‘tdi.

Anjumanda investitsiyalar, sanoat va savdo vaziri o‘rinbosari Badriddin Abidovning maʼlum qilishicha, dastlabki 10 kun davomida (yaʼni joriy yil 4-aprel holatiga) bojxona imtiyozlari asosida import qilingan 36 turdagi tovarlarning 24 turi bo‘yicha ulgurji narxlarning pasayishi kuzatilgan.

“Bunda oziq-ovqat tovarlari yo‘nalishida: ro‘za oyida sevib isteʼmol qilinadigan xurmo – 16 foiz, olma, bexi va nok – 42 foiz, konservalangan baliqlar – 50 foiz, mineral suvlar – 40 foiz, oq shokolad yoki tarkibida kakao bo‘lmagan konfetlar – 24 foizga arzonlashdi. Nooziq-ovqat tovarlari yo‘nalishida: bolalar kiyimlari narxining o‘sishi kuzatilmagan bo‘lsa, bolalar poyabzali narxi 61 foizga arzonlashdi”, — dedi Badriddin Abidov.

Aytilishicha, respublikada ichki savdo tizimini rivojlantirish uchun yanada qulay muhit yaratish, ayniqsa, prezidentning farmoniga muvofiq aholini arzon va sifatli oziq-ovqat va nooziq-ovqat isteʼmol tovarlari bilan barqaror taʼminlash, ulgurji va chakana savdo tarmoqlarida narxlarni doimiy o‘rganib borish maqsadida, Investitsiyalar, sanoat va savdo vazirligida maxsus ishchi guruhi tuzilgan. Ishchi guruh tarkibiga Iqtisodiyot va moliya vazirligi, Qishloq xo‘jaligi vazirligi, Soliq, Bojxona, Raqobatni rivojlantirish qo‘mitalari, Texnik jihatdan tartibga solish va Statistika agentliklarining malakali rahbar va xodimlari kiritilgan.

“Yirik savdo tashkilotlarini ishchi guruh bilan doimiy ravishda muloqot va maslahatlashishga taklif etamiz.

Ikkinchidan, isteʼmol tovarlarini, shu jumladan, bojxona imtiyozlari asosida import qilingan mahsulotlarni respublikaning barcha hududlariga arzon narxlarda va bir maromda yetkazib berish tizimini takomillashtirish yuzasidan takliflarini eshitmoqchimiz”, — dedi investitsiyalar, sanoat va savdo vaziri o‘rinbosari.

Maʼlumot uchun, tashqi iqtisodiy faoliyat munosabatlarida notarif jihatdan tartibga solish choralari bilan bog‘liq yuzaga kelgan muammoli vaziyatlar, to‘siqlar, kelishmovchiliklar va ziddiyatlar mavjud bo‘lgan taqdirda, tegishli taklif va eʼtirozlarni Investitsiyalar, sanoat va savdo vazirligi mutaxassislarining mf91@mift.uz va mf243@mift.uz elektron pochta manzillariga xabar yuborish mumkin.