Божи ноллаштирилган 36 турга кирувчи маҳсулотлар: арзонлашмоқда, кўпаймоқда, талаб қондирилмоқда

Президент Шавкат Мирзиёевнинг 23 мартдаги “Истеъмол бозорларида нархлар барқарорлигини таъминлашга доир қўшимча чора-тадбирлар тўғрисида”ги фармони қабул қилинган эди. Бугун, 8 апрель куни Халқаро бизнес марказида бир қатор вазирлик ва идоралар раҳбарлари, йирик импортёрлар, улгуржи ва чакана савдо тармоқлари эгалари, Ўзбекистоннинг таниқли тадбиркорлари иштирокида фармоннинг ижроси юзасидан давра суҳбати бўлиб ўтди.

Анжуманда инвестициялар, саноат ва савдо вазири ўринбосари Бадриддин Абидовнинг маълум қилишича, дастлабки 10 кун давомида (яъни жорий йил 4 апрель ҳолатига) божхона имтиёзлари асосида импорт қилинган 36 турдаги товарларнинг 24 тури бўйича улгуржи нархларнинг пасайиши кузатилган.

“Бунда озиқ-овқат товарлари йўналишида: рўза ойида севиб истеъмол қилинадиган хурмо – 16 фоиз, олма, бехи ва нок – 42 фоиз, консерваланган балиқлар – 50 фоиз, минерал сувлар – 40 фоиз, оқ шоколад ёки таркибида какао бўлмаган конфетлар – 24 фоизга арзонлашди. Ноозиқ-овқат товарлари йўналишида: болалар кийимлари нархининг ўсиши кузатилмаган бўлса, болалар пойабзал и нархи 61 фоизга арзонлашди”, — деди Бадриддин Абидов.

Айтилишича, республикада ички савдо тизимини ривожлантириш учун янада қулай муҳит яратиш, айниқса, президентнинг фармонига мувофиқ аҳолини арзон ва сифатли озиқ-овқат ва ноозиқ-овқат истеъмол товарлари билан барқарор таъминлаш, улгуржи ва чакана савдо тармоқларида нархларни доимий ўрганиб бориш мақсадида, Инвестициялар, саноат ва савдо вазирлигида махсус ишчи гуруҳи тузилган. Ишчи гуруҳ таркибига Иқтисодиёт ва молия вазирлиги, Қишлоқ хўжалиги вазирлиги, Солиқ, Божхона, Рақобатни ривожлантириш қўмиталари, Техник жиҳатдан тартибга солиш ва Статистика агентликларининг малакали раҳбар ва ходимлари киритилган.

“Йирик савдо ташкилотларини ишчи гуруҳ билан доимий равишда мулоқот ва маслаҳатлашишга таклиф этамиз.

Иккинчидан, истеъмол товарларини, шу жумладан, божхона имтиёзлари асосида импорт қилинган маҳсулотларни республиканинг барча ҳудудларига арзон нархларда ва бир маромда етказиб бериш тизимини такомиллаштириш юзасидан таклифларини эшитмоқчимиз”, — деди инвестициялар, саноат ва савдо вазири ўринбосари.

Маълумот учун, ташқи иқтисодий фаолият муносабатларида нотариф жиҳатдан тартибга солиш чоралари билан боғлиқ юзага келган муаммоли вазиятлар, тўсиқлар, келишмовчиликлар ва зиддиятлар мавжуд бўлган тақдирда, тегишли таклиф ва эътирозларни Инвестициялар, саноат ва савдо вазирлиги мутахассисларининг mf91@mift.uz ва mf243@mift.uz электрон почта манзилларига хабар юбориш мумкин.