Тошкентнинг Юнусобод тез тиббий ёрдам подстанцияси фельдшери Злата Гафурова чақириқ бўйича эркак шифокорлар бригадасини юборгани учун беморнинг ўғли томонидан таҳдидга учраётганини маълум қилди. Бу ҳақда у ўзининг Facebook’даги саҳифасига ёзиб қолдирган.
Злата Гафурованинг блогер Ислам Капарзога билдиришича, подстанцияда ундан диспетчер ўрнини эгаллаб туришни сўрашган. Навбатчилик вақтида бўлган қўнғироқда эркак киши онасининг юраги оғирлашиб қолгани, бироқ унга тиббий ёрдам кўрсатиш учун аёл шифокорлар жўнатилишини талаб қилган.
Ўша вақтда бўш аёл шифокорлар бригадаси ҳам бўлмаган. Гафурова бу ҳақда қўнғироқ қилган фуқарони огоҳлатирган ва эркакнинг розилигини олган.
Бироқ воқеа жойига эркак шифокорлар бригадаси етиб келганида, қўнғироқ қилган шахс уларни уйга киритмай, электрокардиография аппаратини олиб қолмоқчи бўлган. Уларнинг ёнида, фельдшернинг сўзларига кўра, унга ҳам қўнғироқ қилиб, одобсиз сўзлар билан ҳақорат қила бошлаган.
Кейинроқ беморга аёл шифокор бўлган бошқа бир гуруҳ етиб келган. Шифокорлар ҳаёт учун хавфли ҳолатни аниқламаган ва касалхонага ётқизиш шарт эмас деган хулоса берган. Злата Гафурова биринчи тез ёрдам машинаси 17 дақиқада етиб боргани, иккинчиси учун эса бир соатдан кўпроқ вақт кетганини таъкидлайди.
“Бир сафар юракдаги оғриқ сабаб бўлган мурожаатда ҳам аёллар бригадаси келишини сўрашганди, улар етиб боргунча — ўлим. Мана, энди ўйлаб кўр. Бундан кейин эркак шифокорларни нима қилиш керак?”, — деб ёзади фельдшер.
Злата Гафурованинг сўзларига кўра, тунги соат бирларда ички ишлар органлари ходимлари подстанцияга қўнғироқ қилган ва улар устидан шикоят келиб тушганини, яъни диспетчер “нотўғри тез ёрдам бригадасини” юборганини айтган. Ундан ГОМга (шаҳар ИИБ бўлими) келишни сўрашган. Қиз таҳдид ва ҳақоратлар ҳақида қарши ариза ёзган.
Орадан бир неча кун ўтиб Злата Гафурованинг олдига квартал участка нозири қўнғироқ қилади. У нима бўлганини айтиб беришни сўраган ва сўнгра унга қарши аризани қайтариб олишни маслаҳат берган, акс ҳолда фельдшер 12 миллион сўм миқдорида жаримага тортилишини айтган. Қайси хатти-ҳаракатлари учун жарима тўлаши кераклиги сўралганда, туман ИИБ ходими жавоб бермаган.
Кўп ўтмай участка нозирининг олдига тез ёрдам чақирган эркак ҳам етиб келган. Фельдшернинг сўзларига кўра, у ўша ерда ҳам: “Ҳамма жойда таниш-билишларим бор — бутун умрга ишингдан учиб кетасан”, — дея таҳдид қилган.
Аввалроқ Тошкент шаҳар Бектемир туманида тез ёрдам машинасида олиб кетилаётган аёл тиббиёт ходимларига қаршилик кўрсатиб, салондаги жиҳозларни тепиб синдиргани тўғрисида хабар берилганди. Кейинроқ аёл спиртли ичимлик таъсирида бўлгани маълум қилинган эди.
Изоҳ (0)