Тошкент вилояти ҳокими Зоир Мирзаев сайёр қабулида ёрдам сўраб келган 70 ёшдан ошган фуқаронинг дардини тинглаб, отасини қаровсиз қолдирган фарзандларнинг борлиги жамият учун, масъуллар учун уят эканини айтиб, “бу иснод”, деди. Бу ҳақда вилоят ҳокимининг фуқаролар учун навбатдаги сайёр қабулида иштирок этган “Дарё” мухбири хабар берди.
Маълум бўлишича, Тошкент вилояти ҳокими Зоир Мирзаевнинг фуқаролар учун навбатдаги қабули Ўрта Чирчиқ туманида бўлиб ўтган.
Ҳоким қабулида бўлган 70 ёшдан ошган отахон 2007 йилдан бери фарзандлари унга қарамаётгани сабаб қариялар уйига жойлашмоқчи эканини, аммо жойлашишда муаммоларга дуч келаётганини айтиб, вилоят ҳокимидан кўмак сўради.
Фуқаро яшовчи маҳалла раисининг маълумот беришича, мурожаатчи отахоннинг 3 нафар — икки ўғил, бир қиз фарзанди бўлиб, айни пайтда улар отасини қаровсиз қолдиргани сабаб, фуқаро қариялар уйига жойлашиш ҳаракатида юрибди.
“Бу киши саховат уйига жойлашмоқчи. Аммо фарзандлари бунга розилик бермаётгани учун жойлаштиролмаяпмиз”, — дейди вилоят ҳокимининг муаммо юзасидан берган саволига жавоб берган масъул. Мурожаатчи эса 2007 йилдан бери кўчада қолганини айтиб, “70 ёшдан ошдим, аммо 2007 йилдан бери кўчада юрибман, ҳеч ким қарамаяпти”, — деди.
Мурожаатчи отахон, шунингдек, ўз вақтида тракторчи бўлиб ишлаганини, турмуш ўртоғи ҳам фарзандлари билан яшаётганини, унга қарамаётганини билдирди.
.jpg)
“Тракторда юриб, болалар тарбияси қолиб кетган экан-да. Ўзбекчиликка бу тўғри келмайди. Рамазон ойида нималарни гаплашяпмиз. Ўлсин бунақа фарзандлар, отани рози қилолмаган бўлса. Аслида ўша фарзандларни қабул қилувчи жой бўлса, ўша фарзандларни олиб бориб ташлаган бўлардим. Бу ҳаммамиз учун иснод аслида. Мусулмончиликка ҳам тўғри келмайди”, — деди вилоят ҳокими мазкур масала ҳақида гапирар экан.
Ҳоким топшириғига кўра, отахоннинг мурожаати унинг фарзандлари яшовчи хонадонга бориб, масъуллар томонидан ўрганиб чиқиладиган, отахон ҳақиқатан ҳам қаровчисиз қолган бўлса, саховат уйига жойлаштириладиган бўлди.
Изоҳ (0)