“Madaniyat va ma’rifat” telekanali “Karvon” deb qayta nomlanmoqda

“Madaniyat va ma’rifat” telekanali negizida “Karvon” kanalini tashkil etish to‘g‘risidagi qaror loyihasi e’lon qilindi. Bu haqda “Daryo”ga telekanal mas’ul xodimi xabar berdi.

Hujjat loyihasiga ko‘ra, O‘zbekiston Milliy teleradiokompaniyasining “Madaniyat va ma’rifat” telekanali negizida uning moliyalashtirish va mehnatga haq to‘lash tartibi, shtat birliklarini saqlagan holda Madaniyat va turizm vazirligi tizimida “Karvon” telekanali tashkil etilishi kutilmoqda.

O‘zbekiston kino, teatr, musiqa, xoreografiya, sirk, tasviriy va amaliy san’at namunalarini, tashqi va ichki turizmni har tomonlama kengaytirish borasida yaratilayotgan imkoniyatlarni, bag‘rikenglik va insonparvarlik madaniyatini yuksaltirish, millatlararo va konfessiyalararo hamjihatlikni, fuqarolar totuvligini ta’minlash, shuningdek, xorijiy mamlakatlar bilan do‘stona, teng huquqli va o‘zaro manfaatli munosabatlarni mustahkamlashga qaratilgan islohotlar jarayonini keng yoritish yangi telekanalning asosiy vazifasi hisoblanadi.

“Karvon” telekanali davlat muassasasi hamda “Madaniyat va ma’rifat” telekanalining huquqlari, majburiyatlari va shartnomalari, shu jumladan xalqaro shartnomalari bo‘yicha huquqiy vorisi hisoblanadi. Madaniyat va turizm vazirligi bilan kelishgan holda yuqori malakali xorijiy mutaxassislarni shartnoma asosida jalb etish va ishga qabul qilish hamda ajratilgan budjet mablag‘lari doirasida ularga ish haqini milliy valyutada yoki xorijdagi hisobvaraqlariga o‘tkazgan holda chet el valyutasida to‘lashga ruxsat beriladi.

“‘Madaniyat va ma’rifat o‘rniga tashkil qilinishi kutilayotgan kanalning ‘Karvon’ deb nomlanishiga qaraganda, uning turizmga ixtisoslashuvini taxmin qilish mumkin. Biroq bir necha yil oldin Turizmni rivojlantirish davlat qo‘mitasi raisi Aziz Abduhakimov ‘Dunyo bo‘ylab’ kanalini ‘Turizm 365’ kanaliga o‘zgartirish rejalari haqida xabar bergan edi. Umuman, ‘Dunyo bo‘ylab’ kanalining rasmiy saytiga ko‘ra, mamlakatimizning diqqatga sazovor maskanlari, muqaddas qadamjolari, noyob tarixiy-me’moriy obidalari to‘g‘risidagi ilmiy-ommabop va ma’rifiy teledasturlarni yaratish aynan ‘Dunyo bo‘ylab’ kanalining vazifasi hisoblanadi. Demak, madaniyat va san’at yo‘nalishidagi yagona telekanalni yopishga zarurat yo‘q”, — deb yozadi ta’lim bo‘yicha ekspert Komil Jalilov.