“Дарё”да Қашқадарё вилоятининг Қарши туманида истиқомат қилувчи фермер Бекзод Фармонов янги машина харид қилиш учун “Ўзавтосаноат”га “Алоқабанк”нинг Қашқадарё филиали орқали пул тўлагани, аммо мижоз пули банк ходими айби билан ўз вақтида кўрсатилган манзилга тушмагани сабаб машинасини ололмаётгани хабар берилганди. “Алоқабанк” мазкур мақолага муносабат билдириб, камчиликка йўл қўйилгани учун филиал раҳбарига ҳайфсан берилганини, ходимлари огоҳлантирилганини билдирганди.
“Дарё”да эълон қилинган иккинчи мақолада эса банкирлар ходимларини жазолаш орқали муаммога ечим топишга урингани, бироқ мижоз муаммоси очиқлигича қолгани баён қилинганди.
“Алоқабанк” раҳбариятининг “Дарё”га маълумот беришича, мижоз муаммосига 2 хил усулда ечим топишга уринилмоқда.
“Бу ҳақда банк мижозига аввалроқ, яъни иккинчи мақола жамоатчилик эътиборига ҳавола қилинишидан аввал ҳам таклиф берилган. Бироқ мижоз таклифни рад этганди. Биз мижоз билан юзага келган муаммони ҳал этиш учун унга икки хил таклиф беряпмиз. Биринчиси салондан автомобили чиққунга қадар мижоз фойдаланиб туриши учун унга айнан Gentra русумли автомобиль беришимизни айтдик. Иккинчи таклиф эса, айни пайтда у иккиламчи бозордан янги Gentra сотиб олса, қўшимча харажати банк томонидан қопланишини билдирдик”, — дейди банк ахборот хизмати раҳбари Зуҳра Юнусова.
Масъулларнинг қўшимча қилишича, мижоз бу таклифларни рад этган.
“Дарё” журналистининг бу ҳақдаги сўровига жавоб берган банк мижози Бекзод Фармонов эса унга аввалроқ бундай таклиф берилса-да, ишга масъулият билан ёндашилмаганини айтиб, айни пайтда иккинчи таклифни қабул қилишини айтмоқда.
“Мен машина бозордан янги автомобиль харид қиламан. 153 миллион сўмдан ортиқ харажатини банк қоплаб берса, розиман”, — дейди Бекзод Фармонов.
Мурожаатчининг айтишича, у мазкур таклифни қабул қилиш айни пайтда “Алоқабанк”нинг Қашқадарё вилояти филиалига етиб борган.
“Дарё” воқеалар ривожини кузатишда давом этади.
Изоҳ (0)