“Daryo” internet nashrida avtomobil xarid qilish uchun “O‘zavtosanoat” hisob raqamiga mashinaning yuz foiz to‘lovini amalga oshirib, hamon avtomobilini ololmayotgan qashqadaryolik xaridor haqida hikoya qilingandi. Murojaatchining tahririyatga takroriy murojaat qilishiga ko‘ra, muammo hamon yechimini topmagan.
“Men bank orqali ‘O‘zavtosanoat’ga Gentra avtomobili uchun yuz foiz to‘lovni amalga oshirib, aytilgan muddat o‘tsa-da, hali ham avtomobilimni ololmay yurgan xaridorman. Bu haqda murojaat qilmagan joyim qolmadi”, — deydi xaridor Bekzod Farmonov.
Murojaatchining aytishicha, muammo “Daryo” nashrida ommaga oshkor etilgach, mijoz pulini qabul qilib olib, o‘z vaqtida ko‘rsatilgan manzilga o‘tkazmagan bank filiali rahbari Alisher Mirzayev uning xonadoniga borib, yordam berishini aytgan.
“Maqola chiqqach, bank rahbari uyimga kelib, murojaat qilishni to‘xtatishimni, muammoni hal qilib berishini aytdi. Ammo yana aldadi”, — deydi Bekzod Farmonov.
Aniqlanishicha, xaridor 2022-yilning iyul oyida "Aloqabank"ning Qashqadaryo viloyati filiali orqali Gentra avtomobili uchun to‘lovni amalga oshirgan.
“Bank orqali birinchi plastik kartochkamdan 65 million, ikkinchisidan esa 12 million so‘m pul to‘ladim. Bank xodimi to‘lovlar bo‘lgani haqidagi maʼlumotnomalarni qo‘limga tutqazib, pul so‘ralgan joyga o‘tkazilganini aytdi. Xursand bo‘lib uyga qaytdim. Oradan uch oy o‘tgach, avtosalonga borib, mashinam qachon chiqishini, qolgan 50 foiz to‘lovlarni qachon to‘lashim kerakligi haqida maʼlumot olmoqchi bo‘ldim. Avtosalon xodimlari esa ularga hisobimdan hech qanday pul tushmaganini, shartnomaning 7 kunlik muddati o‘tib ketgani bois shartnoma bekor bo‘lganini aytishdi. Bankka kelib, vaziyatga oydinlik kiritsam, bank xodimining aybi bilan men o‘z vaqtida to‘lagan pulim avtosalon hisob raqamiga tushmay, bankda qolib ketgan”, — deydi murojaatchi.
Bekzod Farmonovning aytishicha, 2022-yilning dekabr oyida bank rahbari va avtosalon masʼuli uni chaqirib, “mashinangiz zavoddan chiqib, avtosalonga keldi, mana bu mashina sizniki”, deb unga yangi mashina ko‘rsatgan. Ammo ko‘p o‘tmay bu yolg‘on bo‘lib chiqqan.
“Meni chaqirib, mana bu yangi mashina sizniki, arzimas muammosi qoldi deyishgach, men avtomobil to‘lovining qolgan qismini ham to‘ladim. Lekin 2022-yilning dekabr oyi u yoqda tursin, 2023-yilning fevral oyida ham mashinadan darak yo‘q. Bank rahbariga nega meni aldadingiz desam, avtosalon boshlig‘iga ishongandim, u ham bizni aldadi deyapti. Avtosalon boshlig‘i esa bu haqda gap bo‘lmagan deyapti. Xullas, avtomobil pulini to‘liq to‘lab qo‘ygan bo‘lsam-da, ololmay sarsonman”, — deydi yangi mashina minishga ishtiyoqmand fermer.
“Daryo” mazkur holat yuzasidan “Aloqabank”ning Qashqadaryo viloyati filali masʼuli Alisher Mirzayev bilan ikki marotaba — 2022-yilning sentabr, 2023-yilning fevral oylarida muloqot qilgandi. Dastlabki muloqotda masʼul haqiqatan ham bank xodimlarining xatosi sabab muammo yuzaga kelganini, biroq mijoz bilan kelishganini va aytilgan muddatda muammoni yechishi haqida maʼlum qilgandi. 2023-yilning fevral oyidagi takroriy muloqotda esa muammoni hal etish kechikkanini, buni OAVda yoritib jamoatchilikni bundan boxabar qilish kerakmasligini aytdi. Shuningdek, u fermerga bergan vaʼdasini 2023-yilning 28-fevral kuni bajarishini maʼlum qilgandi. Ammo bank rahbari yana vaʼdasining ustidan chiqmagan.
Xaridorning “Daryo”ga takroriy murojaatida aytilishicha, bank rahbariyati mazkur muammoni bank filiali rahbarini jazolash bilan yechishga uringan.
“Bank rahbariyati muammoni yechishni xodimini jazolash deb bildik shekilli, mening muammoyimga eʼtibor qaratilmadi. Shu sabab 2023-yilning 25-fevral kuni viloyat prokuraturasiga murojaat qildim. Va qo‘limdagi barcha hujjatlarni taqdim qildim. Viloyat prokuraturasi ham ishimni o‘rganishni paysalga solavergach, qayta-qayta murojaat qilib bordim. Uchinchi marta borganimda, ishim shahar prokuraturasiga o‘tganini aytishdi. Shahar prokuraturasiga borsam, ishingiz viloyat prokuraturasidan bizga kelmagan deyishdi. Keyin viloyatdan kod berishgach, ha bizda ekan, tergov qilinayotgan ekan deyishdi. Jamshid Abdullayevich degan xodim o‘rganayotgan ekan. Lekin ayni kungacha ham hech qanday natija yo‘q, prokuratura ham sarson qilmoqda”, — deydi u.
Murojaatchi xaridor 2023-yil inson qadri yuksalayotgan paytda bank rahbari uning shaʼni va qadr-qimmatini kamsitganini aytmoqda.
“Inson qadri yilida bank rahbari mijozning ustidan kulib, shu darajada o‘yin qilishga haqqi bormi? Bunga kim huquq berdi?”, — deydi aldanganini aytgan xaridor.
“Daryo” voqealar rivojini kuzatishda davom etadi.
Izoh (0)