O‘zbekistonda 2022-yilda ekspertizadan o‘tkazilgan qonunchilik hujjatlarining 243 tasida 350 ta korrupsiyaviy omil aniqlandi, deb xabar beradi Adliya vazirligi.
Qayd etilishicha, 2022-yil davomida ijtimoiy himoya, moliya va bank, tadbirkorlik, tashqi iqtisodiy faoliyat hamda bojxona ishiga oid 1 860 ta qonunchilik hujjati korrupsiyaga qarshi ekspertizadan o‘tkazilgan. Ekspertiza natijalariga ko‘ra, hujjatlarda 350 ta korrupsiyaviy omil aniqlangan.
Davlat organlari va tashkilotlari tomonidan 293 ta loyiha korrupsiyaga qarshi ekspertizadan o‘tkazilgan va ularda korrupsiyaviy omillar aniqlanmagani maʼlum qilingan. Lekin ushbu loyihalar Adliya vazirligi tomonidan ekspertizadan o‘tkazilganda ularda 457 ta korrupsiyaviy omil aniqlangan.
Bundan tashqari, vazirlik tomonidan 2022-yilda 280 ta loyiha hamda 18 ta amaldagi qonunchilik hujjatlari tartibga solish taʼsirini baholashdan o‘tkazilgan.
Mazkur jarayon davomida loyihalarning 136 tasi uni ishlab chiqqan vazirlik va idoralar tomonidan tartibga solish taʼsirini baholashdan o‘tkazilmagani, 144 tasi bo‘yicha to‘ldirilgan hisobotlar talab darajasida emasligi aniqlanib, tegishli xulosalar berilgan.
Shuningdek, “Korrupsiyadan xoli qonunchilik”ni yaratish maqsadida 2026-yilga qadar amaldagi 21 mingga yaqin qonunchilik hujjatlari korrupsiyaga qarshi ekspertizadan o‘tkazilishi taʼkidlangan.
Eslatib o‘tamiz, yanvar oxirlarida Transparency International xalqaro nodavlat tashkiloti tomonidan Korrupsiyani qabul qilish indeksi 2022-yil natijalari e’lon qilingandi. 180 ta davlat orasida O‘zbekiston 31 ball bilan 126-o‘rinni egalladi. Mamlakat ballarini 3 taga oshirib, o‘rnini 14 pog‘onaga yaxshilashga (2021-yilda 140 o‘rin) muvaffaq bo‘lgan.
Izoh (0)