Сенатнинг 39-ялпи мажлисида “Жиноят кодексига коррупцияга оид жиноятлар учун жавобгарлик муқаррарлигини таъминлашга қаратилган ўзгартиш ва қўшимчалар киритиш тўғрисида”ги қонун кўриб чиқилди. Бу ҳақда парламент юқори палатаси матбуот хизмати хабар берди.
Жиноят кодекси “коррупцияга оид жиноятлар” деган янги атама билан тўлдирилиб, унга кўра кодекснинг тегишли моддалари, қисми ва бандларида назарда тутилган қилмишлар коррупцияга оид жиноятлар деб топилиши белгиланмоқда ҳамда ушбу жиноятлар учун жазони кучайтириш назарда тутилмоқда.
Шунингдек, ушбу қонун билан Жиноят кодексининг тегишли моддаларига киритилаётган ўзгартиришлар орқали ўзлаштириш ёки растрата йўли билан талон-торож қилиш, фирибгарлик, солиқлар ёки бошқа мажбурий тўловларни тўлашдан бўйин товлаш учун ҳукм қилинган, бироқ жиноят оқибатида етказилган зарарни тўлиқ қопламаган шахсларга ҳамда пора олиш, пора бериш, пора олиш-беришда воситачилик қилиш жиноятларни содир этган шахсларга нисбатан жазодан муддатидан илгари шартли равишда озод қилиш ва жазони енгилроғи билан алмаштириш каби нормалар қўлланилмайди.
Коррупцияга қарши курашиш агентлиги директори Акмал Бурҳоновнинг ёзишича, Сенат мазкур қонунни маъқуллаган. Унга кўра,
- ҳокимият ёки мансаб ваколатини суиистеъмол қилиш (205-модда) ҳамда ҳокимият ҳаракатсизлиги (208-модда) жиноятлари ғаразли ниятларда содир этилган бўлса, беш йилгача озодликдан маҳрум қилиш;
- пора олганлик (210-модда), пора берганлик (211-модда) ва пора олиш-беришда воситачилик қилганлик (212-модда) учун 20 йилгача озодликдан маҳрум қилиш жазоси қўлланилиши белгиланмоқда.
Жиноят кодексининг саккизинчи бўлими Коррупцияга оид жиноятлар атамаси билан тўлдирилмоқда ва 16 та моддада назарда тутилган жиноятлар (167-модда учинчи қисми “д” банди, 168-модда тўртинчи қисми “г” банди, 192-9, 192-10-моддалари, 192-11-модда иккинчи қисми “в” банди, 205-модда иккинчи қисми “в” банди, 206-модда иккинчи қисми “в” банди, 208-модда иккинчи қисми, 209-модда иккинчи қисми “в” банди, 210, 211, 212, 213, 214-моддалари ва 301-модда иккинчи қисми “б” банди) шунингдек, 243-моддада назарда тутилган, коррупцияга оид жиноятларни содир этиш натижасида олинган даромадларга нисбатан содир этилган жиноятлар коррупциявий жиноятлар сифатида эътироф этилмоқда.
Қонун президент томонидан имзолангандан сўнг кучга киради.
Таъкидлаш керакки, Ўзбекистонда коррупцияга оид жиноятлар учун жавобгарлик чоралари кескин кучайтириш назарда тутилган мазкур қонун лойиҳаси 2021 йил декабрда Олий Мажлис депутатлари томонидан биринчи ўқишда қабул қилинганди.
Изоҳ (0)