Американинг Forbes журнали дунёдаги энг бой одамларнинг 37-рейтингини тақдим этди. Биринчи марта рўйхатни LVMH гуруҳи раҳбари Бернард Арно бошқариб, рейтингдаги етакчиликни Илон Маскдан тортиб олди.
“Дарё” дунёдаги энг бой одамнинг компанияси, унинг Forbes рейтингидаги ўсиш кўрсаткичлари, брендларининг сири ва мероси ҳақида сўз юритади.
Бернард Арно холдинги
Арнонинг исми LVMH’га тегишли брендлар каби кенг жамоатчиликка унчалик маълум эмас. Унга тегишли брендлар — Louis Vuitton, Christian Dior, Tiffany, Sephora, Givenchy, Mark Jacobs ва бошқалар.
Бернард Арно LVMH бошқарувини қўлга олганидан сўнг, ўттиз йил ичида компанияни бутун дунё бўйлаб 70 дан ортиқ брендлар ва содиқ мижозларга эга бўлган энг йирик машҳур маҳсулотлар компаниясига айлантирди.
Қимматбаҳо харидлар туфайли компания даромади 1989 йилдаги 4 миллиард доллардан 2022 йилда 86 миллиард долларгача ўсди.
Ўтган йил давомида LVMH акциялари 35 фоизга ошди. Бу сўнгги 12 ой ичида Арнонинг бойлигини 53 миллиард долларга оширди — бу йилги миллиардерлар орасида энг катта кўрсаткич.
Миллиардерлар рейтингидаги ўрни қандай ўзгарган?
Франциялик магнат биринчи марта Forbes миллиардерлар рўйхатига 1997 йилда кирган, ўшанда унинг бойлиги 3,6 миллиард доллар эди.
У тезда муваффақиятга эришиб, 2005 йилда дунёдаги энг бой йигирма кишидан бирига айланган (соф бойлиги 17 миллиард доллар). Кейин эса 2011 йилда рўйхатда тўртинчи ўринга кўтарилган (соф бойлиги 41 миллиард доллар).
2018 йилда Арнонинг бойлиги кескин ўсган — 41,5 миллиард доллардан 71 миллиард долларгача. Шундан сўнг, у рейтингда тўртинчи ўринга чиққан.
Охирги уч йил давомида у Forbes рейтингида учинчи ўринни эгаллаб, ўтган йили етакчиликни Маск ва Amazon асосчиси Жефф Безосга бой бериб қўйган эди.
Таъкидланишича, Бернард Арно ҳашаматли классик буюмларни жозибадор сақлаш формуласини аниқ ўзлаштирган.
Брендларининг муваффақият сири
Нега Louis Vuitton ва Dior каби брендлар шунчалик муваффақиятли? Улар бир-бирига зид бўлган иккита хусусиятга: абадийлик ва замонавийликнинг чўққисига эга, — деган эди Арно 2019 йилда.
2000 долларлик сумкалар, шунингдек, соатлар, заргарлик буюмлари ва кийим-кечакларни сотувчи Louis Vuitton уйи ўтган йили 21,7 миллиард доллар (20 миллиард евро) ишлаб топган.
Унинг янги дизайнерлар ва брендларни жалб қилиш ҳаракати LVMH’га устунлик беради. 2017 йилда поп-юлдуз Рианна билан ҳамкорликда ишга туширилган Fenty Beauty линияси 2019 йилда даромадини 550 миллион долларгача оширган. Компания маълумотларига кўра, ўтган йилги даромад ошкор этилмаган миқдордан икки баравар оширилган.
Албатта, холдинг тарихида ёмон кунлар ҳам бўлган. 2019 йилга келиб Рианна билан ишга туширилган Fenty премиум кийим-кечак линияси омма томонидан тан олинмаган: 2021 йил февралида компания ҳамкорликни тўхтатаётганини эълон қилган.
Мерос
Муваффақият чўққисида бўлган Арно мерос ҳақида қарорлар қабул қилиш арафасида. 2022 йил июль ойида у LVMH акцияларининг асосий қисмига эгалик қилувчи Agache оилавий холдинг компаниясидан у ерда юқори лавозимларда ишлайдиган беш нафар фарзандига тенг улушлар бериш учун қайта ташкил этишни таклиф қилган.
Шунингдек, 2023 йил январь ойида у 47 ёшли қизи Делфинни компаниянинг иккинчи йирик бренди бўлган Dior’га раҳбар этиб тайинлаган.
Аввалроқ италиялик 18 ёшли йигит дунёдаги энг ёш миллиардерга айлангани ҳақида хабар берилганди.
Изоҳ (0)