Amerikaning Forbes jurnali dunyodagi eng boy odamlarning 37-yillik reytingini taqdim etdi. Birinchi marta ro‘yxatni LVMH guruhi rahbari (Christian Dior, Louis Vuitton, Moët & Chandon va boshqa brendlarga ega) Bernard Arno boshqarib, reytingdagi yetakchilikni Ilon Maskdan tortib oldi.
![](/static/2023/Biznes/Fozil/801x-1-80.jpg)
Forbes jurnali Arno va uning oilasining boyligini 211 mlrd dollarga baholagan. U ro‘yxatdagi kapitali 200 milliard dollardan oshgan yagona tadbirkordir.
Bir yil avval LVMH rahbari Ilon Mask va Jeff Bezosdan keyin uchinchi o‘rinni egallagan va uning boyligi 158 mlrd dollarga baholangan edi.
2022-yilda reytingda birinchi o‘rinni egallagan Tesla rahbari ikkinchi o‘ringa tushib ketdi. Uning kapitali 180 mlrd dollarga baholanmoqda, bu uning o‘tgan yilgi natijasi — 219 mlrd dollardan sezilarli darajada kamdir.
O‘tgan yil davomida Mask kapitalining asosini tashkil etuvchi Tesla aksiyalari 65 foizga arzonladi.
Uchinchi o‘rinni Amazon asoschisi Jeff Bezos egalladi, u o‘tgan yili ikkinchi bo‘lgan. Forbes milliarderning boyligini 114 mlrd dollarga baholadi. Bu o‘tgan yilgi ko‘rsatkichdan 57 mlrd dollarga kamroq. Milliarderning kapitali uning IT giganti aksiyalari arzonlashishi ortidan kamaydi.
To‘rtinchi o‘rinni Oracle asoschisi Larri Ellison egalladi, uning boyligi 107 mlrd dollarga baholangan (o‘tgan yilgi reytingda 106 mlrd dollar).
Birinchi beshlikni Berkshire Hathaway kompaniyasi rahbari Uorren Baffet yopdi. Forbes uning boyligini 106 milliard dollarga baholagan bo‘lsa, o‘tgan yili bu ko‘rsatkich 118 mlrd dollarni tashkil qilgan.
Microsoft asoschisi Bill Geyts yangi reytingda to‘rtinchi o‘rindan oltinchi o‘ringa tushib ketdi, Forbes uning boyligini 104 mlrd dollarga baholadi (2022-yilgi ro‘yxatda 129 mlrd dollar).
Top 10 talikka, shuningdek, Nyu-Yorkning sobiq meri va Bloomberg media imperiyasi asoschisi Maykl Blumberg (94,5 mlrd dollar), Meksikaning eng boy milliarderi Karlos Slim (93 mlrd dollar), Osiyoning eng badavlat tadbirkori Mukesh Ambani (83,4 mlrd dollar) va Microsoft asoschisi Stiv Balmer (80,7 mlrd dollar) kirdi.
Google asoschilari Larri Peyj (79,2 mlrd dollar) va Sergey Brin (76 mlrd dollar) reytingning kuchli o‘ntaligidan chiqib ketdi, endi ular ro‘yxatning mos ravishda 12 va 14-pog‘onalarini egallashdi.
Izoh (0)