Rossiya Xavfsizlik kengashi raisi o‘rinbosari Dmitriy Medvedev agar Ukraina Qrimni deokkupatsiya qilishga urinsa, Rossiya yadro qurolidan foydalanishi mumkinligini aytdi. Bu haqda “TASS” xabar berdi.
“Agar Qrimni qaytarib olishga urinish bilan bog‘liq ba’zi jiddiy hujumlar haqida gapiradigan bo‘lsak, bu barcha himoya vositalaridan, jumladan yadroviy to‘xtatib turishning asosiy doktrinasida nazarda tutilganlardan foydalanish uchun asos bo‘ladi. Rossiyaga qarshi har qanday qurol turlaridan foydalanish o‘sha davlatning mavjudligiga tahdid soladi”, — dedi Medvedev.
U “davlatning bir qismini bo‘lib tashlashga urinish bu davlatning mavjudligiga tajovuz ekanini anglatishini” bildirdi.
“Shuning uchun, o‘zingiz xulosa chiqaring: har qanday qurolni qo‘llash uchun aniq asoslar bor. Umid qilamanki, okeanning nari tomonidagi ‘do‘stlarimiz’ buni tushunadi”, — dedi Xavfsizlik kengashi raisi o‘rinbosari.
Shuningdek, Medvedev Ukrainaning Qrimni qaytarish haqidagi bayonotlari asosan “tashviqot” ekanini qayd etdi.
Eslatib o‘tamiz, avvalroq Ukraina prezidenti Vladimir Zelenskiy Rossiya agressiyasi to‘qqiz yil avval Qrimdan boshlanganini, Qrimni qaytarish orqali tinchlik tiklanishini aytgandi.
“Bu bizning yerimiz. Bizning xalqimiz. Bizning tariximiz. Ukraina bayrog‘ini Ukrainaning har bir burchagiga qaytaramiz. Qrim ozod bo‘ladi!” — degan Zelenskiy.
Izoh (0)