Украина 5—7 ой ичида Қримни деоккупация қилиши мумкин. Шу билан бирга, уруш Украинанинг бутун ҳудуди озод қилинмагунча давом этади. Бу ҳақда Украина президенти офиси раҳбарининг маслаҳатчиси Михаил Подоляк “Озодлик радиоси”га берган интервьюсида айтди.
“Биз, албатта, жуда қисқа вақт ичида, тарихий нуқтаи назардан, олти, беш ёки етти ойда Қримда бўламиз. Балки жуда оптимистик туюлар, аммо бу математик жиҳатдан тасдиқланган оптимизм”, — деб ишонтирди у.
Подолякнинг сўзларига кўра, Россияда яриморолдаги вазиятни назорат остида ушлаб туриш учун етарли ресурслар йўқ.
“Уруш мантиғи мутлақо равшан ва биз Ялта соҳилидаги Қрим ҳақиқатлари ҳақида аниқ қилиб гапира оламиз. Биз Қримнинг мутлақо порлоқ келажаги ҳақида аниқ айтишимиз мумкин”, — дея қўшимча қилди у.
Шу билан бирга, у Қрим учун уруш Россия томонидан Украинанинг муайян босиб олинган ҳудудини қайтариш сифатида бўлмаслигини, балки “демократик дунё учун бўлишини” таъкидлади.
“Ҳудуд учун уруш кетмаяпти, ҳудуд фақат уруш элементларидан бири. Бугунги кунда цивилизациялашган дунёнинг мавжудлик ҳуқуқи учун уруш бормоқда. Ва бу цивилизациялашган дунёда Россияга ҳозирги шаклида жой йўқ. Шунинг учун уруш Украинанинг бутун ҳудуди озод қилинмагунча, албатта, давом этади”, — деди Подоляк.
Аввалроқ Украина Миллий хавфсизлик ва мудофаа кенгаши Қримини деоккупация қилишда қўлланиладиган режани ишлаб чиқаётгани хабар берилганди. Режа 12 босқични ўз ичига олади.
Изоҳ (0)