Ukraina prezidenti Vladimir Zelenskiy o‘zining Telegram kanalida 2014-yilda Simferopol (Qrim markazidagi shahar)da Qrim parlamenti binosi yonida bo‘lib o‘tgan mitingga bag‘ishlangan post joylashtirdi. O‘shanda ukrainaparast faollar Qrimning Ukrainadan ajralib chiqishiga qarshi chiqqandi.
“Rossiya agressiyasi to‘qqiz yil avval Qrimdan boshlangandi. Qrimni qaytarish orqali biz tinchlikni tiklaymiz. Bu bizning yerimiz. Bizning xalqimiz. Bizning tariximiz. Ukraina bayrog‘ini Ukrainaning har bir burchagiga qaytaramiz. Qrim ozod bo‘ladi!” — deyiladi Zelenskiyning postida.
2014-yilning 26-fevralida rossiyaparast va ukrainaparast faollar Simferopoldagi parlament binosi yaqinida keng ko‘lamli mitingga to‘planishgan. Ikkinchi guruhga qrim-tatar xalq majlisi boshchilik qilgan. Miting ishtirokchilari o‘rtasida to‘qnashuvlar bo‘lib o‘tgan: o‘ttizga yaqin kishi yaralangan, ikki kishi halok bo‘lgan. Aksiyadan bir oy o‘tmay, Rossiya Qrimni anneksiya qildi va Rossiya hukumati Qrim tatarlarini ta’qib qila boshladi.
2020-yilda Vladimir Zelenskiy Ukrainada 26-fevralni Qrim avtonom respublikasi va Sevastopol shahrining ishg‘ol qilinishiga qarshilik ko‘rsatish kuni sifatida belgilash to‘g‘risidagi farmonni imzoladi.
Bir qator ukrainalik harbiylar va g‘arb ekspertlari Ukraina 2023-yil davomida Qrimni ozod qila oladi, deb hisoblamoqda. Xususan, Janub operativ qo‘mondonligi rahbari Andrey Kovalchuk bu haqda 2022-yil dekabrda gapirgan edi. O‘z navbatida, AQSHning Yevropadagi kuchlari sobiq qo‘mondoni general Ben Xojes Ukraina yozgacha Qrimni ozod qilishi mumkinligini aytdi, biroq u ushbu maqsadga erishish uchun G‘arb davlatlari Ukraina Qurolli kuchlariga kerakli barcha qurollarni yetkazib berishlari zarurligini ham ta’kidladi.
Izoh (0)