Rossiya, Saudiya va boshqa davlatlar kutilmaganda neft qazib olishni qisqartirmoqchi. Buning ortidan narxlar oshdi

Bir qator OPEC+ davlatlari, jumladan, Rossiya va Saudiya Arabistoni “neft bozori barqarorligini qo‘llab-quvvatlashga qaratilgan profilaktik chora sifatida” may oyidan 2023-yil oxirigacha neft qazib olishni qisqartirishini e’lon qildi. Bu haqda Reuters xabar bermoqda. 

2022-yil oktabr oyida OPEC+ mamlakatlari neft qazib olish kvotalari miqdorini 2022-yil avgust oyiga nisbatan kuniga 2 million barrelga kamaytirishga qaror qilgandi. Agar bozordagi vaziyat o‘zgarmasa, kvotalar 2023-yil oxirigacha amal qilishi taxmin qilingan edi.

Fevral oyi boshida AQSH va G7 ning neft va neft mahsulotlari importi bo‘yicha sanksiyalariga duchor bo‘lgan Rossiya mart oyida neft qazib olishni fevral oyi darajasiga nisbatan ixtiyoriy ravishda kuniga 500 ming barrelga qisqartirishini e’lon qildi va yaqinda o‘z qarorini uzaytirgandi — yana uch oyga, aprel oyiga qadar.

Yakshanba kuni bir qator OPEC+ davlatlari neft qazib olish hajmini ixtiyoriy, kelishilgan holda kamaytirishni e’lon qildi — may oyidan boshlab yil oxirigacha. Rossiya ham yil oxirigacha qazib olishni qisqartirishga qaror qildi. 

Hisob-kitoblarga ko‘ra, neft qazib olishning umumiy qisqarishi kuniga taxminan 1,65 million barrelni tashkil etadi. Shundan kuniga 500 ming barrel kelishuv yetakchilari — Rossiya va Saudiya Arabistoniga to‘g‘ri keladi. 

OPEC’ga aʼzo bo‘lmagan mamlakatlardan Qozog‘iston ishlab chiqarishni sutkalik 78 ming barrelga, Ummon esa kuniga 40 ming barrelga qisqartirmoqchi.

OPEC davlatlaridan BAA neft qazib olishni — sutkalik 144 ming barrelga, Kuvayt — 128 ming barrelga, Iroq — 211 ming barrelga, Jazoir — sutkalik ming barrelga kamaytiradi.

Dushanba kuni ertalab OPEC+ ittifoqining bir qator davlatlari, jumladan, Rossiya va Saudiya Arabistoni ishlab chiqarishni qo‘shimcha qisqartirishini eʼlon qilganidan so‘ng, neft narxlari tezlik bilan ko‘tarilmoqda.

Toshkent vaqti bilan soat 10:10 ga kelib, iyun oyida Brent fyucherslari London ICE Futures birjasida 3,93 dollarga (4,92 foiz) oshib, bir barrel uchun 83,82 dollarni tashkil qildi. Juma kuni Brent narxi bir barrel uchun 79,77 dollar edi