Бир қатор ОPEC+ давлатлари, жумладан, Россия ва Саудия Арабистони “нефть бозори барқарорлигини қўллаб-қувватлашга қаратилган профилактик чора сифатида” май ойидан 2023 йил охиригача нефть қазиб олишни қисқартиришини эълон қилди. Бу ҳақда Reuters хабар бермоқда.
![](/static/2023/Biznes/Fozil/801x-1-74.jpg)
2022 йил октябрь ойида ОPEC+ мамлакатлари нефть қазиб олиш квоталари миқдорини 2022 йил август ойига нисбатан кунига 2 миллион баррелга камайтиришга қарор қилганди. Агар бозордаги вазият ўзгармаса, квоталар 2023 йил охиригача амал қилиши тахмин қилинган эди.
Февраль ойи бошида АҚШ ва G7 нинг нефть ва нефть маҳсулотлари импорти бўйича санкцияларига дучор бўлган Россия март ойида нефть қазиб олишни февраль ойи даражасига нисбатан ихтиёрий равишда кунига 500 минг баррелга қисқартиришини эълон қилди ва яқинда ўз қарорини узайтирганди — яна уч ойга, апрель ойига қадар.
Якшанба куни бир қатор ОPEC+ давлатлари нефть қазиб олиш ҳажмини ихтиёрий, келишилган ҳолда камайтиришни эълон қилди — май ойидан бошлаб йил охиригача. Россия ҳам йил охиригача қазиб олишни қисқартиришга қарор қилди.
Ҳисоб-китобларга кўра, нефть қазиб олишнинг умумий қисқариши кунига тахминан 1,65 миллион баррелни ташкил этади. Шундан кунига 500 минг баррел келишув етакчилари — Россия ва Саудия Арабистонига тўғри келади.
ОPEC’га аъзо бўлмаган мамлакатлардан Қозоғистон ишлаб чиқаришни суткалик 78 минг баррелга, Уммон эса кунига 40 минг баррелга қисқартирмоқчи.
ОPEC давлатларидан БАА нефть қазиб олишни — суткалик 144 минг баррелга, Кувайт — 128 минг баррелга, Ироқ — 211 минг баррелга, Жазоир — суткалик минг баррелга камайтиради.
Душанба куни эрталаб ОPEC+ иттифоқининг бир қатор давлатлари, жумладан, Россия ва Саудия Арабистони ишлаб чиқаришни қўшимча қисқартиришини эълон қилганидан сўнг, нефть нархлари тезлик билан кўтарилмоқда.
Тошкент вақти билан соат 10:10 га келиб, июнь ойида Брент фючерслари London ICE Futures биржасида 3,93 долларга (4,92 фоиз) ошиб, бир баррел учун 83,82 долларни ташкил қилди. Жума куни Брент нархи бир баррел учун 79,77 доллар эди
Изоҳ (0)