Остона шаҳрининг Сарияркин тумани 2-сонли суди олигарх Қайрат Бўронбоевни ўта йирик миқдордаги маблағни ўзлаштиришда айбдор деб топиб, 8 йилга озодликдан маҳрум қилди. Бу ҳақда “КазТаг” хабар берди.
Суд қамоқ жазосидан ташқари қозоғистонлик олигархнинг мол-мулкини мусодара қилиш ҳақида қарор чиқарди. Мазкур иш бўйича яна икки айбланувчи — “АсиаГазЧунжа” бош директори Роман Наханов ва “ҚазақГаз” бошқаруви раисининг собиқ ўринбосари Тайир Жанузак ҳам 8 йиллик колонияда жазо ўташга ҳукм қилинди.
Уларнинг барчаси “ҚазақГаз” миллий компаниясига газни қайта сотиш вақтида 14,5 миллиард тенге (тахминан 32 миллион доллар)ни ўзлаштиришда айбдор деб топилди. Барча маҳкумлар давлат хизматидаги лавозимларни эгаллаш ҳуқуқидан умрбод маҳрум этилди. Суд Қозоғистон президенти номига айбдорларни барча давлат мукофотларидан маҳрум қилиш юзасидан тақдимнома киритишга қарор қилди. Маҳкумлар жазони ўртача тартибли колонияда ўтайди.
Қайрат Бўронбоев 2022 йилнинг 15 март куни Олмаота шаҳрида Молиявий мониторинг агентлиги ходимлари томонидан қўлга олинган.
Бўронбоев Қозоғистоннинг биринчи президенти Нурсултон Назарбоевнинг собиқ қудаси. Олигархнинг қизи собиқ давлат раҳбарининг набирасига (Дариға Назарбоевнинг ўғли) турмушга чиққан. Бўронбоев Қозоғистоннинг энг бой одамларидан бири ҳисобланади.
У Қозоғистон, Беларусь ва Россиянинг бир қанча вилоятларида МcDonald’s франчайзи саналади. Россиялик миллиардер Виктор Харитонин ва бошқа ҳамкорлар билан биргаликда Россияда ишлаб чиқилган “Sputnik-V” ковид вакцинасини идишларга солувчи Қараганда фармацевтика комплекси МЧЖга эгалик қилади.
Изоҳ (0)