Qozog‘istonda 19-mart kuni parlamentning quyi palatasi Majlis hamda mahalliy kengash maslihat deputatligiga navbatdan tashqari saylov o‘tkazildi. Tengrinews nashri mazkur jarayonga qancha pul sarflangani haqida ma’lumot berdi.
2022-yil 5-iyun kuni Qozog‘iston tarixida birinchi marta umumxalq referendumi orqali Konstitusiyaga o‘zgartirishlar kiritildi. Referendum o‘tkazish uchun respublika budjetidan 16 milliard 460 million tenge (35 442 674 dollar) ajratildi. Referendum uchun pul hukumat zaxirasidan yo‘naltirildi. O‘shanda referendum o‘tkazuvchi Markaziy komissiyaning ma’lum qilishicha, uchastka va hududiy komissiyalarning qariyb 71 ming nafar a’zosi uchun ushbu mablag‘ning 79 foizi ish haqi sifatida ajratilgan. “Referendum to‘g‘risida”gi qonunga ko‘ra, ularga respublika bo‘yicha o‘rtacha oylik ish haqi to‘lab borilgan.
Saylov uchastkalarini jihozlash, bosma mahsulotlar va saylov byulletenlarini ishlab chiqarish, referendum o‘tkazilishi haqidagi bilbordlar va saylov uchastkalari uchun zarur texnik vositalarni joylashtirishga 21 foiz, ya’ni 3,4 milliard tengedan (7 321 087 dollar) sal ko‘proq mablag‘ sarflangan.
2022-yil 20-noyabrda bo‘lib o‘tadigan navbatdan tashqari prezidentlik saylovlariga jami 20,5 milliard tenge (44 141 848 dollar) ajratilgan. Mablag‘larning 90 foizi 70 mingdan ortiq odamning mehnatini to‘lashga yo‘naltirilgan. Ularning maoshi minimal darajadan uch baravar ko‘p — 60 ming tenge (129 dollar)ni tashkil qilgan. “Xabar” telekanalidagi teledebatlar uchun 63 million tenge (135 655 dollar) sarflangan.
2023-yil 14-yanvar kuni Qozog‘iston parlament Senatiga saylov bo‘lib o‘tdi. Kelgusi olti yilga 50 senatordan 20 nafarini bilvosita saylov huquqi asosida saylash respublika budjetiga 550 ming tengega (1184 dollar) tushdi. Mablag‘ ommaviy tadbirlar, tashviqot materiallari va transport xarajatlari uchun kerak edi. Saylovda 130 nafar nomzod ishtirok etgan.
2023-yilda barcha darajadagi maslihatlarga (mahalliy hokimiyat organlari) va parlament deputatlari saylovini o‘tkazish uchun 33,4 milliard tenge (71 million 918 ming 913 dollar) miqdoridagi xarajatlar kiritilgan. Mablag‘lar avvalroq 2025-yilgi budjet loyihasida zaxiraga olingan.
2023-yilgi respublika budjeti to‘g‘risidagi qonunga ko‘ra, Qozog‘iston parlamentining ikki palatasini ta’minlash uchun (ish haqi, parvozlar, ish safari va kunlik xarajatlar) 22,2 milliard tenge (47 million 802 ming 391 dollar) ajratilgan. 2022-yili ushbu maqsadlar uchun 17,2 milliard tenge (37 036 087 dollar), 2021-yilda esa 13,7 milliard tenge (29 499 674 dollar) yo‘naltirilgan.
Izoh (0)