O‘zbekiston futbol assotsiatsiyasi tartib-intizom qo‘mitasining navbatdagi yig‘ilishi 30-mart, payshanba kuni bo‘lib o‘tdi.
Unda so‘nggi turlar doirasida bo‘lib o‘tgan uchrashuvlardagi hakamlar harakatlari ko‘rib chiqildi.
Superliganing 3-turidan o‘rin olgan “Paxtakor”—“Navbahor” jamoalari bahsidagi vaziyatlar uchun Shahzod Azmiddinovga (“Paxtakor”) nisbatan jarima intizom chorasi, Davron Hoshimovga nisbatan esa 3 o‘yinga diskvalifikatsiya qilish va jarima intizom chorasi qo‘llanildi. Gap shundaki, o‘yinning 68-daqiqasida mehmon jamoa muxlislari tomonidan maydon va futbolchilar tomon turli buyumlar uloqtirilgan. “Paxtakor” futbolchisi Shahzod Azmiddinov esa raqib muxlislariga javoban ular tomon tosh uloqtirgan.
Shuningdek, uchrashuvning 78-daqiqasida mehmonlar vakili Davron Hoshimov raqib futbolchisi boshining orqa qismiga zarba bergani uchun maydondan chetlashtirilgan.
Muxlislar xatti-harakati uchun “Navbahor” futbol klubiga nisbatan jarima intizom chorasi qo‘llanildi. Avvalroq uchrashuvni boshqarib borgan hakamlar guruhiga ham jazo choralari qo‘llangani xabar qilingandi.
Superliganing ilk turidan o‘rin olgan “Metallurg” hamda “Neftchi” jamoalari o‘rtasidagi bahsning 90-daqiqasida mezbonlar futbolchisi Vladislav Kasminin oyog‘ining tag qismi bilan raqibining oyoq qismiga zarba bergani uchun maydondan chetlatilgan. Tartib-intizom qo‘mitasining qaroriga ko‘ra, Vladislav Kasmininga (“Metallurg”) nisbatan 2 ta o‘yinga diskvalifikatsiya qilish va jarima intizom chorasi qo‘llanildi.
Superliganing 2-turidan o‘rin olgan “Surxon”—“Andijon” jamoalari o‘rtasidagi bahsning 90+9-daqiqasida mehmonlar futbolchisi Rubin Xebay bosh hakam shaʼniga haqoratli so‘zlar ishlatgan va maydondan chetlashtirilgan. Tartib-intizom qo‘mitasining qaroriga ko‘ra, Rubin Xebayga (“Andijon”) nisbatan 3 ta o‘yinga diskvalifikatsiya qilish va jarima intizom chorasi qo‘llanildi.
Superliganing 2-turidan o‘rin olgan “Navbahor”—“Metallurg” jamoalari o‘rtasidagi bahsning 73-daqiqasida mezbonlar bosh murabbiyi Samvel Babayan raqib futbolchisi Ibrohim Ibragimovga nisbatan provokatsion harakatlar qilgan (bu harakati uchun S.Babayan sariq kartochka bilan ogohlantirilgan). Bunga javoban Ibrohimov uning sha’niga haqoratli so‘zlar ishlatgan va maydondan chetlashtirilgan. Tartib-intizom qo‘mitasining qaroriga ko‘ra, Ibrohim Ibragimovga (“Metallurg”) nisbatan 2 ta o‘yinga diskvalifikatsiya qilish va jarima, Samvel Babayanga (“Navbahor”) nisbatan esa jarima intizom chorasi qo‘llanildi.
2-turdan o‘rin olgan “So‘g‘diyona”—“Olimpik” jamoalari o‘rtasidagi bahsning 26-daqiqasida mehmonlar vakili Jasur Jaloliddinov raqib futbolchisining oyoq qismiga to‘psiz vaziyatda zarba bergani uchun 2 ta o‘yinga diskvalifikatsiya qilindi va jarima intizom chorasi qo‘llanildi.
Superligasining 3-turidan o‘rin olgan “Metallurg”—“Qizilqum” jamoalari o‘rtasidagi bahsning 42-daqiqasida “Qizilqum” futbolchisi Nikolay Tarasov bosh hakam sha’niga haqoratli so‘zlar ishlatgani uchun maydondan chetlashtirilgan. Tartib-intizom qo‘mitasining qaroriga ko‘ra, Nikolay Tarasovga (“Qizilqum”) nisbatan 3 ta o‘yinga diskvalifikatsiya qilish va jarima intizom chorasi qo‘llanildi.
Izoh (0)