“Пахтакор” футболчиси Шаҳзод Азмиддинов 3 ўйинга четлатилди, “Навбаҳор“ мураббийи Самвел Бабаян эса жаримага тортилди
Ўзбекистон футбол ассоциацияси тартиб-интизом қўмитасининг навбатдаги йиғилиши 30 март, пайшанба куни бўлиб ўтди.
Унда сўнгги турлар доирасида бўлиб ўтган учрашувлардаги ҳакамлар ҳаракатлари кўриб чиқилди.
Суперлиганинг 3-туридан ўрин олган “Пахтакор”—“Навбаҳор” жамоалари баҳсидаги вазиятлар учун Шаҳзод Азмиддиновга (“Пахтакор”) нисбатан жарима интизом чораси, Даврон Ҳошимовга нисбатан эса 3 ўйинга дисквалификация қилиш ва жарима интизом чораси қўлланилди. Гап шундаки, ўйиннинг 68-дақиқасида меҳмон жамоа мухлислари томонидан майдон ва футболчилар томон турли буюмлар улоқтирилган. “Пахтакор” футболчиси Шаҳзод Азмиддинов эса рақиб мухлисларига жавобан улар томон тош улоқтирган.
Шунингдек, учрашувнинг 78-дақиқасида меҳмонлар вакили Даврон Ҳошимов рақиб футболчиси бошининг орқа қисмига зарба бергани учун майдондан четлаштирилган.
Мухлислар хатти-ҳаракати учун “Навбаҳор” футбол клубига нисбатан жарима интизом чораси қўлланилди. Аввалроқ учрашувни бошқариб борган ҳакамлар гуруҳига ҳам жазо чоралари қўллангани хабар қилинганди.
Суперлиганинг илк туридан ўрин олган “Металлург” ҳамда “Нефтчи” жамоалари ўртасидаги баҳснинг 90-дақиқасида мезбонлар футболчиси Владислав Касминин оёғининг таг қисми билан рақибининг оёқ қисмига зарба бергани учун майдондан четлатилган. Тартиб-интизом қўмитасининг қарорига кўра, Владислав Касмининга (“Металлург”) нисбатан 2 та ўйинга дисквалификация қилиш ва жарима интизом чораси қўлланилди.
Суперлиганинг 2-туридан ўрин олган “Сурхон”—“Андижон” жамоалари ўртасидаги баҳснинг 90+9-дақиқасида меҳмонлар футболчиси Рубин Хебай бош ҳакам шаънига ҳақоратли сўзлар ишлатган ва майдондан четлаштирилган. Тартиб-интизом қўмитасининг қарорига кўра, Рубин Хебайга (“Андижон”) нисбатан 3 та ўйинга дисквалификация қилиш ва жарима интизом чораси қўлланилди.
Суперлиганинг 2-туридан ўрин олган “Навбаҳор”—“Металлург” жамоалари ўртасидаги баҳснинг 73-дақиқасида мезбонлар бош мураббийи Самвел Бабаян рақиб футболчиси Иброҳим Ибрагимовга нисбатан провокацион ҳаракатлар қилган (бу ҳаракати учун С.Бабаян сариқ карточка билан огоҳлантирилган). Бунга жавобан Иброҳимов унинг шаънига ҳақоратли сўзлар ишлатган ва майдондан четлаштирилган. Тартиб-интизом қўмитасининг қарорига кўра, Иброҳим Ибрагимовга (“Металлург”) нисбатан 2 та ўйинга дисквалификация қилиш ва жарима, Самвел Бабаянга (“Навбаҳор”) нисбатан эса жарима интизом чораси қўлланилди.
2-турдан ўрин олган “Сўғдиёна”—“Олимпик” жамоалари ўртасидаги баҳснинг 26-дақиқасида меҳмонлар вакили Жасур Жалолиддинов рақиб футболчисининг оёқ қисмига тўпсиз вазиятда зарба бергани учун 2 та ўйинга дисквалификация қилинди ва жарима интизом чораси қўлланилди.
Суперлигасининг 3-туридан ўрин олган “Металлург”—“Қизилқум” жамоалари ўртасидаги баҳснинг 42-дақиқасида “Қизилқум” футболчиси Николай Тарасов бош ҳакам шаънига ҳақоратли сўзлар ишлатгани учун майдондан четлаштирилган. Тартиб-интизом қўмитасининг қарорига кўра, Николай Тарасовга (“Қизилқум”) нисбатан 3 та ўйинга дисквалификация қилиш ва жарима интизом чораси қўлланилди.
