O‘zbekiston futbol assotsiatsiyasi hakamlar qo‘mitasining navbatdagi yig‘ilishi 23-mart, payshanba kuni bo‘lib o‘tdi.
Unda so‘nggi turlar doirasida bo‘lib o‘tgan uchrashuvlardagi hakamlar harakatlari ko‘rib chiqildi.
13-mart kuni bo‘lib o‘tgan Superliganing 3-turi doirasida “Paxtakor”—“Navbahor” o‘rtasidagi bahs hakami Vadim Agishev, VAR hakami Firdavs Norsafarov va assistent hakam Baxtiyorxo‘ja Shavkatov uchrashuv davomida yo‘l qo‘ygan xatolari uchun nazoratchi tomonidan bosh hakam, VAR va assistent hakamlar qoniqarsiz bahoga loyiq ko‘rilgan.
Vadim Agishevga nisbatan Hakamlik intizom kodeksining 2.3 bo‘limi 4-bandiga asosan Superligada 6 tur uchrashuvlaridan chetlashtirish intizom chorasi qo‘llanildi; Firdavs Norsafarovga nisbatan Hakamlik intizom kodeksining 2.3 bo‘limi 7-bandiga asosan Superligada VAR hakami sifatida 4 tur uchrashuvlaridan chetlashtirish intizom chorasi qo‘llanildi (uchrashuv natijasiga ta‘sir ko‘rsatmagani uchun); Baxtiyorxo‘ja Shavkatovga nisbatan nisbatan Hakamlik intizom kodeksining 2.3 bo‘limi 7-bandiga asosan Superligada VAR hakami sifatida 4 tur uchrashuvlaridan chetlashtirish intizom chorasi qo‘llanildi.
Uchrashuvdagi bahsli vaziyatlar Ekspert-hakamlar komissiyasi tomonidan ko‘rib chiqildi.
Unga ko‘ra, uchrashuvning 19-daqiqasida mezbonlar jarima maydoni ichida mehmonlarning 21-raqamli futbolchisi to‘p uchun kurashda maydonga yiqiladi. Biroq ushbu vaziyatda o‘yin qoidasi buzilmagan edi. Hakam ushbu vaziyatda o‘yinni davom ettirishi kerak edi.
Shuningdek, uchrashuvning 71-daqiqasida mezbonlarning 88-raqamli futbolchisi mehmon jamoa muxlislariga qarata tosh uloqtiradi. Futbolchining ushbu harakatlari qizil kartochkaga loyiq edi. Hakam bu vaziyatda “Paxtakor” futbolchisini sportga xos bo‘lmagan harakatlari uchun maydondan chetlashtirishi kerak edi.
Bundan tashqari, uchrashuvning 90+3-daqiqasida mezbonlar jarima maydonchasi ichida “Paxtakor”ning 88-raqamli va “Navbahor”ning 22-raqamli futbolchilari to‘p uchun kurashgan vaqtda to‘p mezbonlar himoyachisining qo‘liga tegadi. Ushbu holatda ikkala futbolchi ham to‘p uchun kurashayotgan bo‘lgan va bu kabi holatlarda to‘pning qo‘lga tegishi qoida buzilishi sifatida qayd etilmaydi. Hakam ushbu vaziyatda o‘yinni davom ettirishi kerak edi.
Superliganing 2-turidan o‘rin olgan “Surxon” va “Andijon” o‘rtasidagi bahsni olib borgan hakam Mahmud Turdiyevga nisbatan ogohlantirish intizom chorasi qo‘llanilgan, VAR hakami Aziz Asimovga bosh hakam sifatida 4 ta, VAR hakami sifatida 8 tur uchrashuvlaridan chetlashtirish intizom chorasi qo‘llanildi, shuningdek, assistent hakam Alisher Usmonovga Superligada yordamchi hakam sifatida 4 ta, assistent hakam sifatida 8 tur uchrashuvlaridan chetlashtirish intizom chorasi qo‘llanildi.
U-21 chempionatining 1-turi doirasida “Turon” va “Buxoro” bahsini olib borgan bosh hakam Akmal Rahimov, ikkinchi yordamchi hakam Azizbek Isakov va zaxira hakami Shahboz Vahobjonov uchrashuv davomida yo‘l qo‘ygan xatolari uchun nazoratchi tomonidan bosh hakam va ikkinchi yordamchi hakam qoniqarli, zaxira hakami esa qoniqarsiz bahoga loyiq ko‘rilgan. Akmal Rahimov va Azizbek Isakovga nisbatan ogohlantirish intizom chorasi, Shahboz Vahobjonovga esa 3 tur uchrashuvlaridan chetlashtirish intizom chorasi qo‘llanildi.
Izoh (0)