Baxmut uchun jang davom etmoqda: Ukraina armiyasi frontdagi vaziyat haqida ma’lumot berdi

Rossiya Donetsk viloyatining Baxmut hududiga hujum qilishda davom etmoqda, ammo to‘qnashuvlar soni sezilarli darajada kamaygan. Ukraina Qurolli kuchlarining sharqiy guruhi spikeri Sergey Cherevatiy bu haqda ma’lumot berdi.

“Vaziyatni yana tahlil qilish kerak. Agar oxirgi ikki kunni oladigan bo‘lsak, kecha (25-mart) Baxmut frontida 18 ta hujum bo‘lgan bo‘lsa, bugun (26-mart) ularning soni 17 taga yetdi. Bungacha 30 dan 50 gacha va undan ko‘proq hujum qayd etilgan”, —dedi Cherevatiy.

Ukraina Qurolli kuchlari rasmiysi Rossiya kuchlari hujumi kamaygani haqida gapirishga hali erta ekanini qayd etdi.

“Qarshi tomonning harakatlarini batafsil tekshirish va tahlil qilish talab etiladi. Ehtimol, ruslar shunchaki zaxirani o‘zgartirmoqda. Rossiya armiyasi jami 268 ta o‘t ochdi, shaharning o‘zi 94 marta o‘qqa tutilgan va 17 ta to‘qnashuv qayd etilgan. Ularning 13 tasi Baxmutning tumanida sodir bo‘lgan”, — deya ta’kidladi u.

Ta’kidlanishicha, Ukraina armiyasi hammasi bo‘lib Rossiya tanki, jangovar desant va piyoda transporti, “Gvozdika ” o‘ziyurar artilleriya moslamasi, kuzatuv-qo‘mondonlik punktini va o‘q-dorilar bilan jihozlangan 10 ta jangovar omborni yo‘q qilgan.