Америка Урушни ўрганиш институти (ISW) ҳисоботида айтилишича, Россия кучлари сўнгги ҳафтада Бахмут ҳудудининг яна беш фоизини эгаллаб олди ва ҳозирда шаҳар ҳудудининг қарийб 65 фоизини назорат қилмоқда.
ISW геожойлашув кўрсатилган видеоларга таяниб, жанубдан “Вагнер” ёлланма жангчилари бўлинмалари шаҳар марказигача, бозор ва шаҳар кенгаши биноси ёнида жойлашган Маданият саройигача силжиганини ёзмоқда.
Шаҳарнинг шимоли-ғарбий қисмида “Вагнер” рангли металлни қайта ишлаш заводи “АЗОМ” ҳудудини тўлиқ эгаллаб олган ва саноат зонасининг жанубига қараб ҳаракатланган.
Бахмут майдони 40 квадрат километрдан бироз кўпроқ, шунинг учун шаҳар ҳудудининг 5 фоизи тахминан икки квадрат километрни ташкил қилади.
Украина Қуролли кучларининг шарқий гуруҳи спикери Сергей Череватий Бахмутда Россия ва Украина кучлари ўртасида жанговар тўқнашувлар сони камайганини маълум қилганди.
“Охирги уч кун ичида жанглар сони камайди, аммо Бахмутдаги вазиятни жиддий таҳлил қилиш керак, бунга қўшинларнинг маълум бир қайта гуруҳланиши сабаб бўлган бўлиши мумкин. Ўйлайманки, кейинги кунлар ёки бир ҳафта ичида бунга нима сабаб бўлганини билишимиз мумкин”, — деди Череватий.
Бахмут йўналишида Россиянинг асосий зарба берувчи кучи “Вагнер”нинг аскарлари бўлиб қолмоқда, аммо улар мунтазам қўшинлар билан мустаҳкамланган.
Изоҳ (0)