Belarus Rossiya yadro qurolining mamlakat hududiga joylashtirilishini mudofaa qobiliyati va xavfsizligini mustahkamlash uchun “majburiy javob choralari” deb atadi. Belarus Tashqi ishlar vazirligi saytida tegishli bayonot e’lon qilindi.
Belarus Tashqi ishlar vazirligiga ko‘ra, bu qadam Yadro qurolini tarqatmaslik to‘g‘risidagi shartnomani hech qanday tarzda buzmaydi.
“Belarus va Rossiya o‘rtasidagi harbiy hamkorlik qat’iy xalqaro huquq normalari asosida amalga oshirilmoqda. Muayyan o‘q-dorilar bilan samolyotlarni boshqarishga qodir belaruslik uchuvchilarni tayyorlash, bunday samolyotlarni modernizasiya qilish Belarus hududida yadro kallaklarini Minsk nazoratisiz Rossiya boshqaruviga asosan joylashtirish bilan teng.
Tegishli texnologiyalardan foydalanish hech qanday tarzda Yadroviy qurollarni tarqatmaslik to‘g‘risidagi shartnomaning I va II moddalari qoidalariga zid emas”, — deyilgan bayonotda.
TIVning qo‘shimcha qilishicha, bunday harakatlarni “yadroviy bo‘lmagan va yadroviy kuchlar o‘rtasidagi harbiy hamkorlik sohasidagi yangilik” deb bo‘lmaydi. Belarus diplomatlari “qo‘shma yadroviy missiyalar amaliyoti azaldan mavjud bo‘lgan” NATOga murojaat qildi. Alyansga a’zo davlatlar hududida AQSHning 150 ta taktik yadro quroli va ulardan foydalanish uchun 250 ta samolyot joylashtirilgani aytiladi. Tashqi ishlar vazirligi bu statistikaga oid hech qanday dalil keltirmagan.
Rossiya Belarusda yadro quroli joylashtiradi
25-mart kuni Putin Rossiya va Belarus xalqaro majburiyatlarni buzmasdan, Belarusda taktik yadro qurolini joylashtirishga kelishib olganini aytdi. Putinning tushuntirishicha, Rossiya o‘z yadro qurolini Belarusga bermayapti, balki AQSH o‘n yil davomida qilgan ishni qilmoqda. Rossiya Belarusda taktik yadro qurollari saqlanadigan ombor qurilishini 1-iyulda yakunlaydi.
AQSH Rossiya hukumatining e’lonidan keyin Amerika yadroviy kuchlarining tayyorgarligini o‘zgartirish uchun hech qanday sabab ko‘rmayotganini qayd etdi.
“Biz Rossiyaning Belarusda yadro quroli joylashtirishi haqidagi xabarlarni ko‘rdik. Yadroviy kuchlarimizning tayyorgarligini o‘zgartirish uchun hech qanday sabab yoki Rossiya yadro qurolidan foydalanishga tayyorlanayotgani alomatlarini ko‘rmadik”, — dedi Pentagon.
Ukraina prezidenti ofis rahbari maslahatchisi Mixail Podolyakning aytishicha, Yevropa Belarusda taktik yadro qurolini joylashtirish qaroriga javoban Rossiyaga qarshi sanksiyalarni kuchaytirishi kerak. Xususan, u “Rosatom”ga nisbatan cheklovlar joriy etishga chaqirdi.
Germaniya tashqi ishlar vazirligi esa Rossiyaning Belarusda yadro qurolini joylashtirish rejalari haqidagi bayonotini “yadroviy qo‘rqitishning navbatdagi urinishi” deb atadi. Shuningdek, TIV Putinning NATO mamlakatlarida yadro qurolini joylashtirishga oid misoli “chalkashtiruvchi va bunga asos bo‘la olmasligini” qayd etdi.
Izoh (0)