Беларусь Россия ядро қуролининг мамлакат ҳудудига жойлаштирилишини мудофаа қобилияти ва хавфсизлигини мустаҳкамлаш учун “мажбурий жавоб чоралари” деб атади. Беларусь Ташқи ишлар вазирлиги сайтида тегишли баёнот эълон қилинди.
Беларусь Ташқи ишлар вазирлигига кўра, бу қадам Ядро қуролини тарқатмаслик тўғрисидаги шартномани ҳеч қандай тарзда бузмайди.
“Беларусь ва Россия ўртасидаги ҳарбий ҳамкорлик қатъий халқаро ҳуқуқ нормалари асосида амалга оширилмоқда. Муайян ўқ-дорилар билан самолётларни бошқаришга қодир беларуслик учувчиларни тайёрлаш, бундай самолётларни модернизация қилиш Беларусь ҳудудида ядро каллакларини Минск назоратисиз Россия бошқарувига асосан жойлаштириш билан тенг.
Тегишли технологиялардан фойдаланиш ҳеч қандай тарзда Ядровий қуролларни тарқатмаслик тўғрисидаги шартноманинг I ва II моддалари қоидаларига зид эмас”, — дейилган баёнотда.
ТИВнинг қўшимча қилишича, бундай ҳаракатларни “ядровий бўлмаган ва ядровий кучлар ўртасидаги ҳарбий ҳамкорлик соҳасидаги янгилик” деб бўлмайди. Беларусь дипломатлари “қўшма ядровий миссиялар амалиёти азалдан мавжуд бўлган” НАТОга мурожаат қилди. Алянсга аъзо давлатлар ҳудудида АҚШнинг 150 та тактик ядро қуроли ва улардан фойдаланиш учун 250 та самолёт жойлаштирилгани айтилади. Ташқи ишлар вазирлиги бу статистикага оид ҳеч қандай далил келтирмаган.
Россия Беларусда ядро қуроли жойлаштиради
25 март куни Путин Россия ва Беларусь халқаро мажбуриятларни бузмасдан, Беларусда тактик ядро қуролини жойлаштиришга келишиб олганини айтди. Путиннинг тушунтиришича, Россия ўз ядро қуролини Беларусга бермаяпти, балки АҚШ ўн йил давомида қилган ишни қилмоқда. Россия Беларусда тактик ядро қуроллари сақланадиган омбор қурилишини 1 июлда якунлайди.
АҚШ Россия ҳукуматининг эълонидан кейин Америка ядровий кучларининг тайёргарлигини ўзгартириш учун ҳеч қандай сабаб кўрмаётганини қайд этди.
“Биз Россиянинг Беларусда ядро қуроли жойлаштириши ҳақидаги хабарларни кўрдик. Ядровий кучларимизнинг тайёргарлигини ўзгартириш учун ҳеч қандай сабаб ёки Россия ядро қуролидан фойдаланишга тайёрланаётгани аломатларини кўрмадик”, — деди Пентагон.
Украина президенти офис раҳбари маслаҳатчиси Михаил Подолякнинг айтишича, Европа Беларусда тактик ядро қуролини жойлаштириш қарорига жавобан Россияга қарши санкцияларни кучайтириши керак. Хусусан, у “Росатом”га нисбатан чекловлар жорий этишга чақирди.
Германия ташқи ишлар вазирлиги эса Россиянинг Беларусда ядро қуролини жойлаштириш режалари ҳақидаги баёнотини “ядровий қўрқитишнинг навбатдаги уриниши” деб атади. Шунингдек, ТИВ Путиннинг НАТО мамлакатларида ядро қуролини жойлаштиришга оид мисоли “чалкаштирувчи ва бунга асос бўла олмаслигини” қайд этди.
Изоҳ (0)