“Bunday reaksiya Rossiya rejalariga ta’sir o‘tkaza olmaydi”. Kreml G‘arb sanksiyalariga qaramay, Belarusda yadro quroli joylashtirilishini bildirdi
Kremlning ta’kidlashicha, Rossiya yangi sanksiyalar tahdidiga qaramay, Belarusda taktik yadroviy qurollarni joylashtirish rejalaridan voz kechmoqchi emas.
“Bunday reaksiya, albatta, Rossiyaning rejalariga o‘tkaza olmaydi. Prezident (Putin) shanba kuni bergan intervyusida hamma narsani tushuntirdi. Bunga qo‘shimcha qiladigan hech narsa yo‘q”, — dedi Rossiya prezidentining matbuot kotibi Dmitriy Peskov 27-mart kuni jurnalistlarga.
25-mart kuni “Rossiya 24” telekanali Vladimir Putinning “Moskva. Kreml. Putin” dasturi muallifiga bergan intervyusini namoyish etdi. Unda Putin Rossiya Belarus hududida taktik yadro qurollarini joylashtirishini aytgan. Rossiya prezidentining so‘zlariga ko‘ra, Belarus harbiy-havo kuchlarining 10 ta samolyoti allaqachon ushbu turdagi qurollardan foydalanishga tayyor. Bundan tashqari, Putin Rossiya Belarusga “Iskandar” majmuasini topshirganini aytdi, u ham taktik yadro qurolini tashiy oladi.
Qo‘shma Shtatlar Vladimir Putinning bayonotidan keyin Amerika yadroviy kuchlarining tayyorgarligini o‘zgartirish uchun hech qanday sabab ko‘rmayotganini qayd etdi. Germaniya Rossiya prezidentining bayonotini “yadro bilan qo‘rqitishga yangi urinish” deb hisoblamoqda.
Yevropa diplomatiyasi rahbari Jozep Borrel, agar Rossiya Belarusda yadro qurolini joylashtirsa, unga qarshi sanksiyalar bilan tahdid qildi. Ukraina ushbu masala bo‘yicha BMT Xavfsizlik kengashining navbatdan tashqari yig‘ilishini chaqirishni talab qildi.
