Xitoy Tashqi ishlar vazirligi Rossiyaning Belarusda taktik yadro quroli joylashtirish qaroriga munosabat bildirdi. Bu haqda Xitoy TIV matbuot kotibi Mao Ninga tayanib, Sohu nashri xabar berdi.
Pekin munosabatida yadro urushi hech qachon boshlanmasligi kerakligi, tomonlar Ukraina inqirozini diplomatik yo‘l bilan hal qilishga e’tibor qaratishi kerakligi qayd etilgan.
“2022-yilning 5-yanvarida yadroviy qurolga ega davlatlar rahbarlari qo‘shma bayonot bilan yadro urushida g‘alaba qozonish yoki unga qarshi kurashish mumkin emasligi haqida bayonot berdi, yadro urushida g‘alaba qozonish yoki unga qarshi kurashish mumkin emasligi aytildi, (bayonotda) yadro quroliga ega bo‘lgan davlatlar o‘rtasidagi urushlarning oldini olish va strategik xavflarni kamaytirish kerakligi ta’kidlandi”, — deya eslatdi Mao Nin.
Uning ta’kidlashicha, hozirgi sharoitda barcha tomonlar “Ukraina inqirozini tinch yo‘l bilan hal qilish bo‘yicha diplomatik sa’y-harakatlarga e’tibor qaratishi va vaziyatni yumshatishda birgalikda harakat qilishi kerak”.
25-mart kuni Putin Moskva va Minsk xalqaro majburiyatlarni buzmasdan, Belarusda taktik yadro qurolini joylashtirishga kelishib olganini aytdi. Putinning tushuntirishicha, Rossiya o‘z yadro qurolini Belarusga bermayapti, balki AQSH o‘n yil davomida qilgan ishni qilmoqda. Rossiya Belarusda taktik yadro qurollari saqlanadigan ombor qurilishini 1-iyulda yakunlaydi.
AQSH va Ukraina Rossiya Belarusda taktik yadro qurolini joylashtirilishiga qanday munosabat bildirdi?
AQSH Rossiya hukumatining e’lonidan keyin Amerika yadroviy kuchlarining tayyorgarligini o‘zgartirish uchun hech qanday sabab ko‘rmayotganini qayd etdi.
“Biz Rossiyaning Belarusda yadro quroli joylashtirishi haqidagi xabarlarni ko‘rdik. Yadroviy kuchlarimizning tayyorgarligini o‘zgartirish uchun hech qanday sabab yoki Rossiya yadro qurolidan foydalanishga tayyorlanayotgani alomatlarini ko‘rmadik”, — dedi Pentagon.
Ukraina prezidenti ofisi rahbari maslahatchisi Mixail Podolyakning aytishicha, Yevropa Belarusda taktik yadro qurolini joylashtirish qaroriga javoban Rossiyaga qarshi sanksiyalarni kuchaytirishi kerak. Xususan, u “Rosatom”ga nisbatan cheklovlar joriy etishga chaqirdi.
Germaniya tashqi ishlar vazirligi esa Rossiyaning Belarusda yadro qurolini joylashtirish rejalari haqidagi bayonotini “yadroviy qo‘rqitishning navbatdagi urinishi” deb atadi. Shuningdek, TIV Putinning NATO mamlakatlarida yadro qurolini joylashtirishga oid misoli “chalkashtiruvchi va bunga asos bo‘la olmasligini” qayd etdi.
Izoh (0)