2022 йилда Панамадан 250 мингга яқин муҳожир АҚШга бориш мақсадида Дарен ёриғининг “ўлим жунглиси”ни кесиб ўтди. Бироқ, бу йил уларнинг сони 400 минг кишига етиши мумкин, деди Панама ташқи ишлар вазири Жаниан Тевани. Бу ҳақда Financial Times нашри хабар бермоқда.
Нашр Дарен ёриғи орқали ўтадиган йўл ботқоқликлар, заҳарли илонлар ва у ерга ўрнашган маҳаллий тўдалар туфайли жуда хавфли эканини эслатди. Панама расмийларига кўра, 2022 йилда Лотин Америкаси, Хитой, Афғонистон ва бошқа мамлакатлардан келган жами 248 284 муҳожир ушбу ҳудудни кесиб ўтган.
“Биз бу йил минтақадан 400 минг киши ўтишини кутмоқдамиз”, — деди Тевани.
Унинг сўзларига кўра, ушбу йўлдан фойдаланганларнинг кўпчилиги жиноий тўдалар томонидан Колумбия чегарасига етказилган. Вазирнинг таъкидлашича, одамлар жунгли бўйлаб юришда хавфсизлик қоидаларига атай нотўғри ёндашади, бунинг оқибатида кўпчилик ҳалок бўлади.
FT таъкидлаганидек, биргина 2022 йилнинг январидан октябригача АҚШнинг жанубий чегарасида қарийб 2,4 миллион мигрант ҳибсга олинган. Вашингтон бу оқимни “Америка дуч келган энг катта мигрантлар инқирози” деб атаган.
Расмий Панама маълумотларига кўра, 2023 йилда Дарен ёриғи йўналишидан фойдаланаётган муҳожирларнинг учдан бир қисмидан кўпроғи Гаитидан келган. Хитойдан келган муҳожирлар сони ҳам кўпайди — жорий йилнинг дастлабки икки ойида 2 200 га яқин хитойлик хавфли жунгли орқали Панамага ўтди, бу ўтган йилдагидан кўпроқ.
Панама — Марказий Америкадаги давлат, Кариб денгизи ва Тинч океани оралиғидаги Панама бўйнида жойлашган. У шимолда Коста-Рика ва жанубда Колумбия билан чегарадош.
Дарен ёриғи Панама жанубидаги Дарен миллий боғида жойлашган. Даранинг жанубий қисмидаги Атрато дарёси делтаси 80 км кенгликдаги ботқоқли йўлларни ҳосил қилади, минтақа шимолида баландлиги 1 875 метрга етадиган тропик ўрмонлар билан қопланган Серрания дел Дариен тоғлари жойлашган.
Изоҳ (0)