“Garri Potter” kinokartinasidagi roli bilan tanilgan aktyor Deniel Redkliff va uning sevgilisi Erin Dark birinchi marta ota-ona bo‘ladi. Bu haqda ularning vakili The Hollywood Reporter nashriga bergan intervyusida ma’lum qildi.
Redkliff va Dark birinchi marta 2013-yilda “Yaxshi ko‘rgan insonlaringizni o‘ldiring” filmini suratga olish jarayonida tanishgan. Hozirda 33 yoshda bo‘lgan aktyor People jurnaliga bergan intervyusida baxtli hayot kechirayotganini aytgan.
Deniel Redkliff 2022-yilda “Yo‘qolgan shahar” komediyasi va “G‘alati: Al Yankovich hikoyasi” biografik filmida suratga tushdi. Ikkinchi filmdagi roli tufayli aktyor “Oltin globus” va BAFTA mukofotlarini qo‘lga kiritdi.
Ma’lumot uchun, Deniel Redkliff 1989-yilning 23-iyul sanasida Buyuk Britaniyada tug‘ilgan. Aktyor yozuvchi Joan Rouling asarlari asosida suratga olingan “Garri Potter” filmi qismlarida bosh rolni ijro etganidan keyin dunyo bo‘ylab mashhurlikka erishdi va 2009-yilda u Ginnesning rekordlar kitobiga o‘n yillikning eng ko‘p gonorar oluvchi aktyori sifatida kiritildi.
Aktyor Gollivudning Shon-shuhrat xiyobonida o‘z yulduziga ega. U kinodagi faoliyati davomida “Garri Potter” filmining bir nechta qismlarida, “Jungli”, “Xavfli topshiriq”, “Pretoriyadan qochish” va yana ko‘plab kinokartinalarda rol ijro etgan.
Izoh (0)