“Гарри Поттер” кинокартинасидаги роли билан танилган актёр Дэниeл Редклифф ва унинг севгилиси Эрин Дарк биринчи марта ота-она бўлади. Бу ҳақда уларнинг вакили The Hollywood Reporter нашрига берган интервьюсида маълум қилди.
Редклифф ва Дарк биринчи марта 2013 йилда “Яхши кўрган инсонларингизни ўлдиринг” фильмини суратга олиш жараёнида танишган. Ҳозирда 33 ёшда бўлган актёр People журналига берган интервьюсида бахтли ҳаёт кечираётганини айтган.
Дэниел Редклифф 2022 йилда “Йўқолган шаҳар” комедияси ва “Ғалати: Ал Янкович ҳикояси” биографик фильмида суратга тушди. Иккинчи фильмдаги роли туфайли актёр “Олтин глобус” ва BAFTA мукофотларини қўлга киритди.
Маълумот учун, Дэниел Редклифф 1989 йилнинг 23 июль санасида Буюк Британияда туғилган. Актёр ёзувчи Жоан Роулинг асарлари асосида суратга олинган “Гарри Поттер” фильми қисмларида бош ролни ижро этганидан кейин дунё бўйлаб машҳурликка эришди ва 2009 йилда у Гиннеснинг рекордлар китобига ўн йилликнинг энг кўп гонорар олувчи актёри сифатида киритилди.
Актёр Голливуднинг Шон-шуҳрат хиёбонида ўз юлдузига эга. У кинодаги фаолияти давомида “Гарри Поттер” фильмининг бир нечта қисмларида, “Жунгли”, “Хавфли топшириқ”, “Преториядан қочиш” ва яна кўплаб кинокартиналарда рол ижро этган.
Изоҳ (0)