Жангларнинг шиддатли бориши сабаб Украина армияси ҳар куни 4 000 тадан 7 000 тагача артиллерия ўқларини сарфлашга мажбур бўлмоқда. Бу ҳақда НАТО бош котиби Йенс Столтенберг маълум қилди, деб ёзади The Guardian.
Шу билан бирга, НАТО раҳбари Россия томони суткасига бундан ҳам кўпроқ снарядлардан фойдаланаётганини таъкидлади.
“Уруш шу қадар шиддатли кечмоқдаки, Украина кунига 4 000 дан 7 000 тагача, Россия Федерацияси эса 20 000 тагача артиллерия снарядларини ишлатмоқда. Ҳозир ўқ-дори истеъмоли даражаси ишлаб чиқариш даражасидан юқори”, — деди Столтенберг.
Унинг таъкидлашича, Украина учун ўқ-дорилар масаласи долзарблигича қолмоқда, чунки Путин урушни тугатиш ниятида эмас.
“Ғарб Украинани ўқ-дори ва қуроллар билан давомли қўллаб-қувватлашга тайёрланиши керак”, — деди НАТО бош котиби.
Унинг сўзларига кўра, Россия ҳарбий-саноат ишлаб чиқаришни кўпайтирмоқда, шунингдек, қурол-яроғ учун Эрон, Шимолий Корея ва бошқа давлатларга мурожаат қилмоқда.
Шундан келиб чиқиб, алянс раҳбари НАТО аъзоларини мудофаа харажатларини оширишга чақирди.
Изоҳ (0)