O‘zbekiston Ulan-Bator shahrida 18 yoshgacha bo‘lgan terma jamoalari o‘rtasida bo‘lib o‘tgan Osiyo va Okeaniya chempionatida chempionlik unvonini qo‘lga kiritdi.
Mo‘g‘uliston poytaxti Ulan-Bator shahrida 18 yoshgacha bo‘lgan terma jamoalari o‘rtasida Osiyo va Okeaniya chempionati bo‘lib o‘tdi. O‘zbekiston U18 terma jamoasi beshta uchrashuvda beshta g‘alabaga erishib, chempionlik unvonini qo‘lga kiritdi.
O‘zbekiston yoshlari Turkmaniston (5:0), Eron (14:1), Mo‘g‘uliston (7:4), Tailand (10:2) va BAA (8:1) jamoalarini ketma ket mag‘lub etdi. Merganlar va to‘purarlar poygasida O‘zbekiston terma jamoasi sardori Jasurbek Rustamxonov peshqadamlik qilmoqda. Beshta uchrashuv natijasida u o‘z hisobiga 26 ochko (14 gol va 12 golli uzatma)ni yozdi.
Terma jamoaning bu ishtiroki O‘zbekiston xokkeyi tarixidagi Xalqaro Federatsiya (IIHF) tomonidan tashkil etilgan ilk chempionat bo‘ldi. O‘zbekiston xokkey federatsiyasi uchun yana bir yangilik sodir bo‘ldi. Ushbu xalqaro chempionatda hakamlik qilayotgan David Prokofevdan keyin 19 yoshli Sergey Yermakov ham xalqaro toifadagi hakamga aylandi.
Aynan Mo‘g‘ulistonda bo‘lib o‘tayotgan chempionatda IIHF hakamlikni rivojlantirish bo‘limi boshlig‘i Joel Xansson O‘XF hakamlik bo‘limi boshlig‘i Vladislav Kiselevga Sergeyning litsenziyasini topshirdi. Sergey Yermakov ham, xuddi David Prokofev kabi, Vladislav Kiselev boshchiligidagi O‘XF hakamlar maktabining bitiruvchisi.
Izoh (0)