“Hatto axlatga pul yig‘ish uchun ham o‘qituvchi chiqardi” — Farg‘onadagi maktab-internati direktori o‘qituvchilar obro‘si haqida gapirdi

Farg‘ona shahrida viloyat yoshlari tashabbusi bilan bo‘lib o‘tgan Konstitutsiyaviy qonun loyihasi bo‘yicha targ‘ibot tadbiri Farg‘ona viloyatidagi chet tillarini o‘qitishga ixtisoslashtirilgan davlat umumtaʼlim maktab-internati direktori Eleonara Dadajonova chiqish qilib, o‘qituvchilar obro‘si haqida gapirdi.

“Esimda, yaqin-yaqingacha kasbimni so‘rashsa, o‘qituvchiman, deb aytishga iymanganman. Chunki o‘qituvchi jamiyatning xuddiki eng keraksiz a’zosidek bo‘lib qolgandi. O‘qituvchining obro‘si tushgan, himoyasiz edi. Unga esa hamma xo‘jayin. Hali qarasang, hokimiyat ko‘cha supurishga chiqargan, hali qarasang, mahalla ‘svet’ga yoki gazga pul to‘lamaganlarni ro‘yxatga oldirgan, hatto axlatga pul undirish uchun ham o‘qituvchini yuborishardi”, — deydi direktor.

U o‘qituvchilarning paxta yetishtirish va yig‘im-terim ishlarida ishtirok etib kelgani haqida ham gapirib o‘tdi va endilikda yangi Konstitutsiyada o‘qituvchilar sha’ni himoya qilinishi belgilab qo‘yilayotganini qayd etdi.

“Xudoga shukur, endi bularning barchasini yomon tushdek eslaymiz. Lekin afsuski, bu ishlar faqat o‘qituvchilarning o‘zinigina kamsitmadi. Mana shu himoyasiz o‘qituvchilar maktabga kelganidan keyin ham o‘quvchilarga dars berishdan boshqa hamma ishni qilgan. Bechora o‘qituvchi tufayli bir necha avlodning taʼlim-tarbiyasi izdan chiqdi”, — deydi direktor.

“Endi Konstitutsiyamizning 52-moddasida davlat ham, jamiyat ham o‘qituvchilarning shaʼni, qadr-qimmatini himoya qilishi o‘z aksini topadi. Bundan buyon hech qaysi mansabdor o‘qituvchilarni kamsita olmaydi”, — deydi Eleonara Dadajonova.