“Daryo” nashri 17-martda O‘zbekiston va jahonda sodir bo‘lgan eng muhim voqealarni e‘tiboringizga havola etadi.
Xitoy prezidentining Rossiyaga tashrifidan nimalar kutilyapti?
“Ukraina inqirozini siyosiy yo‘l bilan hal qilish”ning 12 ta rejasini taqdim etgan Xitoy prezidenti 20-22-mart kunlari davlat tashrifi bilan Rossiyada bo‘ladi.
Si Szinpin Vladimir Putinning taklifiga ko‘ra Moskvaga kelyapti. Ikki prezidentning oxirgi muzokarasi 2022-yil dekabr oyida onlayn tarzda bo‘lgan. Xitoy Tashqi ishlar vazirligi xabariga ko’ra, ushbu tashrif “ikki davlat o‘rtasidagi munosabatlar rivojiga yangi surʼat bag‘ishlaydi
Eslatib o‘tamiz, Rossiyadagi muzokaralardan so‘ng Si Szinpin Ukraina prezidenti Vladimir Zelenskiy bilan urush boshidan beri ilk suhbatini o‘tkazadi.
Ukrainadagi vaziyatga kelsak, hozirda Baxmutdagi ukrain askarlari o‘q dorilarga muhtoj. Ukraina Qurolli Kuchlari hamkorlardan qurol yetkazishda tezroq harakat qilishini so‘ramoqda.
Ukraina Tashqi ishlar vaziri BBC’ga bergan intervyusida hozir Ukraina harbiy va iqtisodiy jihatdan G‘arb yordamiga bog‘liq bo‘lishi mumkin, ammo tinchlik davrida mamlakatning g‘alla eksporti katta hajmga ega deya ta‘kidlagan.
Xitoy va Pokiston ziddiyati sabab Sovet davridagi harbiy texnikalar yangilana boshladi
Pokiston kuchlari, Himolay tog‘laridagi bahsli chegara bo‘ylab Xitoy qo‘shinlari bilan ziddiyatda turgan bir paytda Hindiston Sovet davridagi harbiy texnikani modernizatsiya qilishni boshladi.
Reuters xabariga ko‘ra ayni paytda mamlakat armiya uchun katta miqdorda qurol sotib olishni ma’qullagan. Raketalar, vertolyotlar, artilleriya va radioelektron kurashish tizimlarini sotib olishga 8,5 milliard dollar sarflanadi.
Hindiston bu safar qurollarni xorijdan sotib olish o‘rniga buyurtmalarning barchasini mahalliy ishlab chiqarish kompaniyalariga berishni rejalashtirmoqda. Bu esa o‘z-o‘rnida Hindiston harbiy-sanoatini mustahkamlashni maqsad qilgan, amaldagi bosh vazir Narendra Modining strategiyasini namoyon qiladi.
Hindiston shu bilan birga harbiy-dengiz floti rivojiga ham alohida e’tibor qaratmoqda, chunki hukumat o‘tgan yildan buyon Xitoyning Hind okeanidagi faolligi oshganidan xavotirda.
Navro‘z yomg‘irlar bilan kelmoqda, sel suv toshqinlari 9 viloyatda kuzatilishi mumkin
Navro‘z bayramiga tayyorgarlik O‘zbekistonning barcha viloyatlarida boshlandi. 19-22-mart kunlari bayram munosabati bilan ochiq osmon ostida turli sayillar va tadbirlar o‘tkaziladi.
Ammo bayram arafasi qanday ob-havo bo‘lishini aniqlab olish aslo zarar qilmaydi. Ayni paytda “O‘zgidromet” direktori 18-22-mart kunlari to‘qqizta viloyatda sel-suv toshqini yuzaga kelishi mumkinligidan ogohlantirmoqda.
Ma’lum qilinishicha, ushbu sanalarda kutilayotgan kuchli yomg‘irlar yog‘ishi sababli respublikaning quyidagi tog‘oldi va tog‘li hududlarida sel-suv toshqin hodisalari yuzaga kelishi mumkin:
- Qashqadaryo viloyati Yakkabog‘, Dehqonobod, Chiroqchi, Kitob, Shahrisabz, Qamashi, G‘uzor tumanlarida;
- Surxondaryo viloyati Sariosiyo, Uzun, Oltinsoy, Denov, Boysun, Sherobod, Sho‘rchi, Qumqo‘rg‘on, Muzrabot tumanlarida;
- Samarqand viloyati Urgut, Samarqand, Bulung‘ur, Nurobod, Qo‘shrabot, Kattaqo‘rg‘on, Payariq, Jomboy, Ishtixon tumanlarida;
- Navoiy viloyati Xatirchi, Navbahor, Nurota, Konimex, Karmana tumanlarida;
- Jizzax viloyati Zomin, Baxmal, G‘allaorol, Sharof Rashidov, Forish, Yangiobod tumanlarida;
- Toshkent viloyati Ohangaron, Bo‘stonliq, Parkent, Piskent, O‘rta Chirchiq, Yuqori Chirchiq tumanlarida va Angren, Olmaliq shaharlarida;
- Namangan viloyati Pop, Kosonsoy, Chortoq, Chust, Namangan, Yangiqo‘rg‘on tumanlarida;
- Farg‘ona viloyati So‘x, Shohimardon, Farg‘ona, Beshariq tumanlarida;
- Andijon viloyati Andijon, Asaka, Jalaquduq, Qo‘rg‘ontepa, Paxtaobod, Izboskan, Xo‘jaobod, Marhamat tumanlarida va Xonobod shahrida.
“Tog‘oldi va tog‘li hududlarda istiqomat qiluvchi fuqarolar, dam oluvchilar hamda tog‘li hududlarda harakatlanuvchi haydovchilardan ehtiyotkorlik choralarini ko‘rishlarini so‘raymiz”, — deyiladi xabarda.
Izoh (0)