Respublika Gidrometeorologiya markazi 21-martgacha kuzatiladigan ob-havo haqida ma’lumot berdi.
Unga ko‘ra, 18-mart, shanba kuni O‘zbekistonning janubi-g‘arbiy hududlariga Turkmaniston orqali Kaspiy dengizidan kelayotgan siklon bilan bog‘liq bo‘lgan bulutli massivlar kirib kelishi boshlanadi. Respublika hududining katta qismida yog‘ingarchiliksiz ob-havo bo‘lishi saqlanib turadi, faqat Qashqadaryo, Surxondaryo viloyatlarida va kunning ikkinchi yarmida Buxoro, Navoiy, Samarqand viloyatlarining baʼzi joylarida biroz yomg‘ir yog‘adi, momaqaldiroq bo‘lishi mumkin.
Yakshanba va dushanba kunlari O‘zbekiston bo‘yicha nam siklon o‘tishida beqaror ob-havo bo‘lishi kutilmoqda. Aksariyat viloyatlarda yomg‘ir yog‘adi, momaqaldiroq bo‘lishi mumkin. Farg‘ona vodiysi viloyatlarida 20-mart kuni yomg‘ir yog‘adi. Qoraqalpog‘iston Respublikasi va Xorazm viloyatida yog‘ingarchilik kutilmaydi. Respublikaning tog‘oldi va tog‘li hududlarida baʼzi joylarda yomg‘ir kuchli bo‘ladi.
Ushbu kunlarda havo harorati nisbatan pasayadi va 17-20 daraja iliqni tashkil etadi. 17—19-martda respublikaning ayrim hududlarida shamol 15-20 metr/sekundgacha kuchayishi mumkin.
21-mart — Navro‘z bayrami nishonlanadigan kuni O‘zbekistonda kam bulutli va quruq ob-havo bo‘lishi kutilmoqda. Havo harorat yana 22-25 darajaga ko‘tariladi.
17—21-mart kunlari Toshkent, Namangan viloyatlarining tog‘li hududlarida 2000 metrdan yuqorida qor ko‘chishi xavfi bor.
Toshkentda 18-mart kuni yog‘ingarchilik kutilmaydi. Asosan kuchsiz shamol sharqiy yo‘nalishda esadi. Havo harorati kechalari 8-10 daraja iliq, kunduzi kunlari 21-23 daraja iliq bo‘ladi.
Yakshanba kuni kechga tomon yomg‘ir yog‘ishi, momaqaldiroq bo‘lishi mumkin. Sharqiy yo‘nalishdagi shamol 5-10 metr/sekund tezlikda esishi saqlanib turadi, 12-15 metr/sekundgacha kuchayishi mumkin. Havo harorati kechasi 8-10 daraja iliq, kunduzi 20-22 daraja iliq bo‘ladi.
Dushanba kuni vaqti-vaqti bilan yomg‘ir yog‘adi, momaqaldiroq bo‘lishi mumkin. Harorat kechasi 8-10 daraja iliq, kunduzi 17-19 daraja iliq bo‘ladi.
Izoh (0)