Республика Гидрометеорология маркази 21 мартгача кузатиладиган об-ҳаво ҳақида маълумот берди.
Унга кўра, 18 март, шанба куни Ўзбекистоннинг жануби-ғарбий ҳудудларига Туркманистон орқали Каспий денгизидан келаётган циклон билан боғлиқ бўлган булутли массивлар кириб келиши бошланади. Республика ҳудудининг катта қисмида ёғингарчиликсиз об-ҳаво бўлиши сақланиб туради, фақат Қашқадарё, Сурхондарё вилоятларида ва куннинг иккинчи ярмида Бухоро, Навоий, Самарқанд вилоятларининг баъзи жойларида бироз ёмғир ёғади, момақалдироқ бўлиши мумкин.
Якшанба ва душанба кунлари Ўзбекистон бўйича нам циклон ўтишида беқарор об-ҳаво бўлиши кутилмоқда. Аксарият вилоятларда ёмғир ёғади, момақалдироқ бўлиши мумкин. Фарғона водийси вилоятларида 20 март куни ёмғир ёғади. Қорақалпоғистон Республикаси ва Хоразм вилоятида ёғингарчилик кутилмайди. Республиканинг тоғолди ва тоғли ҳудудларида баъзи жойларда ёмғир кучли бўлади.
Ушбу кунларда ҳаво ҳарорати нисбатан пасаяди ва 17-20 даража илиқни ташкил этади. 17—19 мартда республиканинг айрим ҳудудларида шамол 15-20 метр/секундгача кучайиши мумкин.
21 март — Наврўз байрами нишонланадиган куни Ўзбекистонда кам булутли ва қуруқ об-ҳаво бўлиши кутилмоқда. Ҳаво ҳарорат яна 22-25 даражага кўтарилади.
17—21 март кунлари Тошкент, Наманган вилоятларининг тоғли ҳудудларида 2000 метрдан юқорида қор кўчиши хавфи бор.
Тошкентда 18 март куни ёғингарчилик кутилмайди. Асосан кучсиз шамол шарқий йўналишда эсади. Ҳаво ҳарорати кечалари 8-10 даража илиқ, кундузи кунлари 21-23 даража илиқ бўлади.
Якшанба куни кечга томон ёмғир ёғиши, момақалдироқ бўлиши мумкин. Шарқий йўналишдаги шамол 5-10 метр/секунд тезликда эсиши сақланиб туради, 12-15 метр/секундгача кучайиши мумкин. Ҳаво ҳарорати кечаси 8-10 даража илиқ, кундузи 20-22 даража илиқ бўлади.
Душанба куни вақти-вақти билан ёмғир ёғади, момақалдироқ бўлиши мумкин. Ҳарорат кечаси 8-10 даража илиқ, кундузи 17-19 даража илиқ бўлади.
Изоҳ (0)